AMEA-nın Mərkəzi Elmi Kitabxanasının (MEK) Qadınlar Təşkilatı 11 Fevral - Qadınlar və Qızlar Elmdə Beynəlxalq Gününə həsr olunan “Azərbaycan qadınlarının dünya elminə töhfəsi” adlı tədbir keçirib.
“Tehsil365“ AZƏRTAC-a istinadən xəbər verir ki, MEK-dən AZƏRTAC-a bildirilib ki, təşkilatın sədri, Qarabağ müharibəsi qəhrəmanları fondunun rəhbəri Röksanə Səfərzadə tarixin bütün dövrlərində Azərbaycan qadınının rolundan danışıb. O, bu gün tarixin ən qüdrətli dövrünü yaşayan, qalib ölkənin qadınları kimi Azərbaycan qadınnıın ölkəmizin ictimai-siyasi, mədəni həyatında mühüm rol oynadıqlarını diqqətə çatdırıb.
Sonra AMEA-nın Qadınlar Şurasının sədr müavini fəlsəfə üzrə fəlsəfə doktoru Mahrux Nəcəflinin texnoloji innovasiyaların gender bərabərliyinə təsiri mövzusunda çıxışı dinlənilib. Elm və texnologiyanın sürətli inkişafı fonunda qadınların innovativ sahələrə inteqrasiyasının əhəmiyyətini ön plana çəkildiyini diqqətə çatdıran Mahrux Nəcəfli innovativ yanaşmaların elmi tədqiqatlarda səmərəliliyi artırdığını və qadınların STEM - elm, texnologiya, mühəndislik, riyaziyyat sahələrində imkanlarını genişləndirdiyini vurğulayıb.
Daha sonra MEK-in kitabxana xidməti üzrə direktor müavini Şəhla Quliyeva Qadınlar və Qızlar Elmdə Beynəlxalq Gününün tarixindən danışaraq günün əsas məqsədlərindən olan gender bərabərsizliyinin elmdə qlobal miqyasını, qızların erkən yaşlardan elmdən uzaqlaşması problemini, elmi innovasiya və qərarvermədə müxtəlifliyin əhəmiyyətini şərh edib.
MEK-in elmi katibi Şəbnəm Rüstəmova qeyd edib ki, tarixən Azərbaycan qadını cəmiyyətdə yüksək və mötəbər mövqe tutub. O bildirib ki, Ulu Öndər Heydər Əliyevin əsasını qoyduğu dövlət qadın siyasəti Prezident İlham Əliyev tərəfindən ardıcıl və məqsədyönlü şəkildə həyata keçirilir. Birinci vitse-prezident Mehriban Əliyevanın çoxşaxəli fəaliyyəti isə ölkəmizdə qadına göstərilən ehtiramın və etimadın parlaq nümunəsidir.
Əminə Axundova çıxışında anası, Birinci Qarabağ müharibəsi şəhidi, Milli Qəhrəman Gültəkin Əsgərovanın timsalında Azərbaycan qadınının mərdliyi, vətənə bağlılığı və mənəvi gücündən söz açıb.
Q.Qarayev adına Mərkəzi İncəsənət Məktəbinin direktoru sənətşünaslıq üzrə fəlsəfə doktoru, professor Könül Hüseynova çıxışında Azərbaycan musiqi mədəniyyətində qadınların rolundan, milli, professional musiqimizə gətirdikləri yeniliklərdən bəhs edib.
Tədbirdə, həmçinin MEK-in Rəqəmsal kitabxana və süni intellekt şöbəsinin rəhbəri Şəfəq Əliyeva dünyanın bir çox STEM sahələrində qızların payının 35 faiz olduğu halda, Azərbaycanda bu göstəricinin təxminən 40 faizə çatdığını, bu rəqəmlərin təsadüfi olmadığını, dövlətin yürütdüyü əsaslı siyasətin və ictimai dəstəyin nəticəsi olduğunu deyib.
Digər çıxışlarda qadınların elmi fəaliyyətə cəlb edilməsinin Azərbaycanda yüksək səviyyədə olduğu bildirilib. Həmçinin ali təhsil və doktorantura pillələrində qadınların iştirakının yüksək olduğu qeyd edilib.
