Balıq yağı əlavələri son dərəcə populyardır. İstifadəsinin artması isə belə bir sualı gündəmə gətirir: Balıq yağı doğrudan da faydalıdır, yoxsa təsiri şişirdilir?

“Tehsil365” Ölkə.az-a istinadən xəbər verir ki, milyardlarla dollarlıq qida əlavələri sektorunun aparıcı məhsullarından biri olan balıq yağları son klinik araşdırmalar fonunda müzakirə mövzusuna çevrilib.

Mütəxəssislər bildirir ki, Omega-3 əlavələrinin ürək sağlamlığına təsiri düşünüldüyü qədər güclü olmaya bilər.

Dünyada milyonlarla insanın “ürək dostu” adı ilə hər gün qəbul etdiyi balıq yağı kapsulları elm aləmində fikir ayrılığı yaradıb.

Uzun illər damar sərtliyinin qarşısını aldığı və beyin funksiyalarını gücləndirdiyi iddia edilən bu əlavələrin əslində nə dərəcədə təsirli olduğu müasir klinik sınaqlarla araşdırılıb.

Cochrane Kitabxanası tərəfindən yayımlanan və 112 mindən çox iştirakçını əhatə edən genişmiqyaslı analiz, Omega-3 əlavələrinin infarkt və ya insult riskini azaltmaqda statistik baxımdan əhəmiyyətli fərq yaratmadığını ortaya qoyub.

Araşdırma nəticələri kapsul formasında olan yağların qida yolu ilə qəbul edilən təzə balığın yerini tutmadığını da təsdiqləyib.

Harvard Tibb Məktəbində fəaliyyət göstərən Dr. JoAnn Manson, rəhbərlik etdiyi VITAL araşdırmasının nəticələrinə əsasən diqqətçəkən açıqlamalar verib.

Manson bildirib ki, “Ümumi əhali üçün balıq yağı əlavələrinin ürək-damar xəstəliklərinin qarşısının alınmasında açıq və net faydası müşahidə olunmayıb. Lakin müəyyən risk qrupları və yüksək triqliserid səviyyəsi olan şəxslər üçün vəziyyət fərqli ola bilər.”

Klivlend Klinikasının Kardiologiya şöbəsinin müdiri Dr. Steven Nissen isə məsələyə daha sərt yanaşıb.

Nissen qida əlavələri sektorunda nəzarətin zəifliyinə diqqət çəkərək deyib:
“Bir çox istehlakçı sağlam qidalanmanın yerini tuta biləcəyi düşüncəsi ilə bu kapsullara üz tutur. Halbuki elmi məlumatlar göstərir ki, bu məhsulların əksəriyyəti sadəcə ‘bahalı sidik’ istehsal etməkdən başqa bir işə yaramır.”

Oklend Universitetində çalışan Prof. Dr. Ueyn Katfild bazardakı balıq yağı məhsullarının keyfiyyəti ilə bağlı sarsıdıcı hesabat təqdim edib.

Katfild bildirib ki, uzun raf ömrünə malik bir çox kapsul əslində oksidləşib, yəni xarab olub.

Professorun sözlərinə görə, “Oksidləşmiş yağların qəbulu orqanizmə fayda vermək əvəzinə iltihabi prosesləri gücləndirə bilər”.