Bu gün görkəmli Azərbaycan şairi, dramaturq və ədəbiyyatşünas Bəxtiyar Vahabzadənin vəfatından növbəti ildönümü qeyd olunur.
"Tehsil365" xəbər verir ki,Bəxtiyar Vahabzadə 16 avqust 1925-ci ildə Nuxa şəhərində (indiki Şəki) anadan olub. O, Azərbaycan ədəbiyyatının ən parlaq simalarından biri kimi uzun illər milli poeziyanın inkişafında mühüm rol oynayıb. 1945-ci ildən Azərbaycan Yazıçılar Birliyinin üzvü olan şair yaradıcılığı boyu vətənpərvərlik, milli kimlik, azadlıq və mənəvi dəyərlər mövzularına xüsusi yer verib.
Bəxtiyar Vahabzadə həm də görkəmli alim kimi fəaliyyət göstərib. 1964-cü ildə filologiya elmləri doktoru elmi dərəcəsini alıb, professor adına layiq görülüb. 2000-ci ildə Azərbaycan Milli Elmlər Akademiyasının həqiqi üzvü seçilib.
Onun ədəbi və elmi fəaliyyəti dövlət tərəfindən yüksək qiymətləndirilib. Şair 1976-cı ildə Azərbaycan SSR Dövlət Mükafatına, 1984-cü ildə isə həm Azərbaycan SSR xalq şairi fəxri adına, həm də SSRİ Dövlət Mükafatına layiq görülüb.
Bəxtiyar Vahabzadə 13 fevral 2009-cu ildə Bakı şəhərində vəfat edib. Onun zəngin ədəbi irsi Azərbaycan ədəbiyyatının qızıl fonduna daxil olub və bu gün də oxucular tərəfindən böyük maraqla qarşılanır.