Bu gün Azərbaycan yazıçısı, jurnalist və dramaturq Əfqan Hacıağa oğlu Əsgərovun anım günüdür.
"Tehsil365" xəbər verir ki,Əfqan Əsgərov 23 sentyabr 1929-cu ildə Qarabağlı kəndində anadan olub. Uzun illər ədəbiyyat və mətbuat sahəsində fəaliyyət göstərən sənətkar həm nəsr, həm dramaturgiya, həm də publisistika janrlarında məhsuldar yaradıcılığı ilə seçilib. O, Azərbaycan Yazıçılar Birliyinin üzvü olub.
Əfqan Əsgərovun əsərlərində milli-mənəvi dəyərlər, insan taleyi və cəmiyyət problemləri geniş şəkildə əksini tapıb. Onun dramaturji əsərləri müxtəlif teatr səhnələrində tamaşaya qoyulub və tamaşaçılar tərəfindən maraqla qarşılanıb.
Sənətkarın mədəniyyət sahəsində xidmətləri dövlət tərəfindən yüksək qiymətləndirilib və 1989-cu ildə ona “Azərbaycan SSR əməkdar incəsənət xadimi” fəxri adı verilib. O, həmçinin pedaqoji fəaliyyətlə məşğul olaraq Təfəkkür Universitetində jurnalistika professoru kimi çalışıb, gənc jurnalistlərin yetişməsinə töhfə verib.
Əfqan Əsgərov 13 fevral 2022-ci ildə Bakı şəhərində vəfat edib. Onun zəngin ədəbi irsi Azərbaycan mədəniyyətində özünəməxsus yer tutur.