Azərbaycan Respublikasında dövlət idarəçiliyinin təkmilləşdirilməsi, dövlət qulluqçularının peşəkarlıq səviyyəsinin artırılması və insan resurslarının səmərəli idarə olunması istiqamətində həyata keçirilən tədbirlər çərçivəsində maarifləndirici və ixtisasartırma təlimləri davam etdirilir. Bu məqsədlə Azərbaycan Respublikasının Prezidenti yanında Dövlət İdarəçilik Akademiyasında (DİA) Naxçıvan Muxtar Respublikasının mərkəzi icra hakimiyyəti orqanlarında fəaliyyət göstərən dövlət qulluqçuları üçün “Dövlət qulluqçularının fəaliyyətinin qiymətləndirilməsi” mövzusunda təlim keçirilib. Təlim Azərbaycan Respublikasının Prezidenti yanında Dövlət İdarəçilik Akademiyasının dosenti, hüquq elmləri doktoru Qədirov Asif tərəfindən aparılıb.
“Tehsil365" xəbər verir ki, təlim çərçivəsində dövlət qulluqçularının fəaliyyətinin qiymətləndirilməsinin normativ-hüquqi əsasları, qiymətləndirmə sisteminin prinsipləri, meyarları və mərhələləri, nəticələrin ölçülməsi və təhlili mexanizmləri, eləcə də qiymətləndirmə nəticələrinin karyera inkişafı və motivasiya sisteminə inteqrasiyası məsələləri elmi-nəzəri və praktiki aspektdə təhlil olunub. Eyni zamanda, fəaliyyətin qiymətləndirilməsi prosesində obyektivliyin, şəffaflığın və hesabatlılığın təmin edilməsi mexanizmləri geniş şəkildə izah edilib.
Təlim interaktiv müzakirələr və praktiki nümunələr əsasında təşkil olunub, iştirakçıların sualları cavablandırılıb.