Azərbaycan təsviri sənətinin görkəmli nümayəndələrindən biri, boyakar Davud Mehdi oğlu Kazımovun xatirəsi ehtiramla anılır.
"Tehsil365" xəbər verir ki, 1926-cı il noyabrın 9-da Bakı şəhərində anadan olan Davud Kazımov uzun illər ərzində milli rəngkarlıq məktəbinin inkişafına mühüm töhfələr verib. O, yaradıcılığında daha çox portret, mənzərə və məişət janrlarına üstünlük verərək Azərbaycan insanının obrazını və təbiətinin gözəlliklərini kətan üzərində ustalıqla əks etdirib.
Sənətkarın əsərləri özünəməxsus üslubu, zəngin kolorit həlli və dərin psixoloji ifadəliliyi ilə seçilib. Onun yaratdığı tablolar respublikanın muzey və qalereyalarında, həmçinin şəxsi kolleksiyalarda qorunur.
Davud Kazımov sənət sahəsindəki xidmətlərinə görə 1992-ci ildə “Azərbaycan Respublikasının xalq rəssamı” fəxri adına layiq görülüb. O, Azərbaycan təsviri sənətinin inkişafında və gənc rəssamların yetişməsində də fəal iştirak edib.
Görkəmli rəssam 2015-ci il fevralın 14-də Bakıda vəfat edib. Onun zəngin yaradıcılıq irsi milli incəsənət tarixində xüsusi yer tutur və bu gün də dəyərini qoruyur.