“Psixoloji baxımdan sağlam məktəb mühiti uşağın özünü təhlükəsiz, dəyərli və qəbul olunmuş hiss etdiyi bir atmosfer üzərində qurulmalıdır.”
Bu sözləri “Təhsil365”ə açıqlamasında psixoloq Mətanət Əliyeva bildirib.
Psixoloq qeyd edib ki, belə mühit yalnız akademik nəticələrə deyil, həm də şagirdlərin emosional rifahına və şəxsiyyət kimi sağlam inkişafına xidmət edir. Onun sözlərinə görə, məktəblərdə ilk növbədə təhlükəsizlik və hörmət mədəniyyəti formalaşdırılmalı, bullinq və zorakılığa qarşı sıfır tolerantlıq prinsipi tətbiq olunmalıdır.
“Empatiya və dəstəyə əsaslanan müəllim–şagird münasibətləri uşaqların özlərini güvənli hiss etməsinə və öyrənmə motivasiyasının artmasına səbəb olur”, – deyə o vurğulayıb.
Mətanət Əliyeva bildirib ki, məktəblərdə peşəkar psixoloji xidmət sistemi fəaliyyət göstərməli, diaqnostika, fərdi və qrup dəstəyi, profilaktik proqramlar və valideynlərlə əməkdaşlıq davamlı şəkildə həyata keçirilməlidir. O əlavə edib ki, şagirdlərin sosial-emosional bacarıqlarının inkişafı tədris prosesinə inteqrasiya olunmalıdır.
Psixoloq müəllim və idarə heyətinin psixoloji rifahının da vacib olduğunu qeyd edib. Onun sözlərinə görə, məktəbin emosional iqlimini formalaşdıran əsas nümunələr böyüklərdir və stres altında çalışan müəllimlər sağlam mühit yarada bilmirlər. Bu səbəbdən müəllimlər üçün psixoloji dəstək proqramlarının tətbiqi vacibdir.
Mütəxəssis vurğulayıb ki, araşdırmalar psixoloji cəhətdən dəstəkləyici məktəb mühitində həm şagirdlərin akademik nailiyyətlərinin, həm də müəllimlərin peşə məmnunluğunun daha yüksək olduğunu göstərir.
“Psixoloji sağlamlıq məktəbdə əlavə komponent deyil, təhsilin keyfiyyətinin ayrılmaz hissəsidir”, – deyə Mətanət Əliyeva fikrini yekunlaşdırıb.