“2025-ci ildə ölkə üzrə 220 min uşaq məktəbəqədər təhsilə cəlb olunub. Hazırda 1708 dövlət məktəbəqədər təhsil müəssisəsi fəaliyyət göstərir. Bu, uşaqların həm elmi, həm sosial, həm də tərbiyəvi inkişafı üçün böyük imkan yaradır. Eyni zamanda, 131 min 815 uşaq birinci sinfə qəbul edilib, 86 min 395 uşaq isə məktəbəhazırlıq qruplarına qatılıb. Bu rəqəmlər göstərir ki, məktəbəqədər təhsil uşaqların məktəbə adaptasiyasını asanlaşdırır.”
Təhsil Eksperti Ramin Nurəliyev “Tehsil365”ə açıqlamasında bildirib ki, məktəbəqədər təhsil uşaqların gələcək inkişafı üçün mühüm əhəmiyyət daşıyır.
Nurəliyev qeyd edib ki, baxçaların Elm və Təhsil Nazirliyinin tabeliyinə verilməsi şəffaflığın artmasına səbəb olub:
“Artıq tərbiyəçi müəllimlərin seçimi mərkəzləşdirilmiş imtahanlarla aparılır və nəticələrə əsasən onların əmək fəaliyyətinə başlamasına icazə verilir. Nazirlik həmçinin baxçalara qəbulun onlayn formatda aparılması üçün lazımi şəraiti yaradıb.”
Ekspertin sözlərinə görə, baxçalar valideynlər üçün də mühüm üstünlüklər yaradır:
“Əmək fəaliyyəti göstərən valideynlər azyaşlı uşaqlarını rahat şəkildə baxçaya yerləşdirə bilirlər. Baxçaların açılma və bağlanma saatlarının iş rejiminə uyğun olması valideynlər üçün əlavə rahatlıqdır. Üstəlik, baxçalarda bütün proseslərin dövlət tərəfindən həyata keçirilməsi müsbət haldır.”
Nurəliyev vurğulayıb ki, məktəbəqədər təhsil müəssisələrinin sayı ölkədə ürək açan səviyyədə deyil:
“Hazırda ölkədə 4279 ümumi təhsil müəssisəsi fəaliyyət göstərir, müəllim heyəti 130 min nəfərdən, şagird sayı isə 1,6 milyondan çoxdur. Bu rəqəmlər fonunda baxçaların sayının artırılması vacibdir. Çünki baxçalar uşaqların tərbiyəsi, valideynlərin iş fəaliyyəti və elmi biliklərin ötürülməsi üçün çox lazımlı təhsil müəssisələridir.”