Azərbaycanın tanınmış ziyalısı, yazıçı və publisist Ceyhun bəy Əbdülhüseyn bəy oğlu Hacıbəyli milli mətbuat və istiqlal tarixində mühüm iz qoymuş şəxsiyyətlərdən biri kimi xatırlanır.
"Tehsil365" xəbər verir ki, 1891-ci ildə Şuşada anadan olan Ceyhun bəy XX əsrin əvvəllərində ölkənin aparıcı mətbu orqanları olan “Kaspi”, “Baku”, “İrşad” və “Tərəqqi” qəzetləri ilə əməkdaşlıq edib.
1917-ci ildə “İttihad” qəzetinin redaktoru kimi fəaliyyət göstərən publisist, Azərbaycan Xalq Cümhuriyyəti qurulduqdan sonra dövlətin rəsmi orqanı olan “Azərbaycan” qəzetinə baş redaktor təyin olunub. 1919-cu ildə Azərbaycan nümayəndə heyətinin tərkibində Paris Sülh Konfransında iştirak edərək ölkənin beynəlxalq səviyyədə tanınması istiqamətində fəaliyyət göstərib.
1920-ci ildə Cümhuriyyətin süqutundan sonra mühacirətə gedən Ceyhun bəy Parisdə fransız mətbuatı ilə əməkdaşlıq edib. O, əsasən Sovet hakimiyyətinin Qafqazdakı siyasətini tənqid edən məqalələrlə çıxış edib və Azərbaycanın müstəqillik ideyalarını beynəlxalq ictimaiyyətə çatdırmağa çalışıb.
Onun “İlk müsəlman Respublikası Azərbaycan”, “Qarabağ dialekti və folkloru (Qafqaz Azərbaycanı)”, “Azərbaycan mətbuat tarixi” və “İslam əleyhinə təbliğat və onun Azərbaycandakı metodları” kimi əsərləri elmi və tarixi baxımdan dəyərli mənbələr hesab olunur. Ceyhun bəy Parisdə fransız dilində nəşr olunan “Qafqaz”, eləcə də Münhendə çap edilən “Azərbaycan” jurnalının redaktoru olub.
Qeyd edək ki, Ceyhun bəy görkəmli Azərbaycan bəstəkarları — Üzeyir Hacıbəyov və Zülfüqar Hacıbəyovun qardaşı idi.
1962-ci il oktyabrın 22-də Parisdə vəfat edən Ceyhun Hacıbəyli Azərbaycan milli mətbuatının və mühacirət irsinin ən önəmli nümayəndələrindən biri kimi tarixdə qalır.