Tatarıstan Respublikasının Azərbaycan Respublikasındakı daimi nümayəndəliyində “Mənim sözüm, mənim həyatım xalqıma məxsusdur” adlı ədəbi-musiqili gecə keçirilib. Tədbir görkəmli tatar maarifçisi Kayum Nasirinin anadan olmasının 201 illiyinə və qəhrəman şair Musa Cəlilin 120 illik yubileyinə həsr olunub.
“Tehsil365“AZƏRTAC-a istinadən xəbər verir ki, tədbirin təşkilatçısı qismində Bakı “Kayum Nasiri İnstitutu” tədris-mədəniyyət mərkəzi çıxış edib.
Tədbirin proqramı tatar xalqının mədəni və mənəvi irsini təbliğ etmək, tarixi yaddaşı qorumaq və mədəniyyətlərarası dialoqu gücləndirmək məqsədi daşıyırdı.
Ədəbi-musiqili gecənin əvvəlində tamaşaçılara K. Nasirinin həyat və yaradıcılığı haqqında videoçarx nümayiş etdirilib.
Maarifçinin təhsillə bağlı nəsihətləri barədə fraqmentlər, eləcə də milli mədəniyyətin zənginliyini əks etdirən xalq mahnıları, rəqslər və tatar folkloru əsərlərinin ifaları təqdim edilib. Alimin təhsil missiyasına və təhsil sisteminin inkişafındakı töhfəsinə xüsusi diqqət yetirilib.
Proqramın ikinci hissəsi şair, II Dünya müharibəsinin iştirakçısı, cəsarət və Vətənə sədaqət rəmzi olan Musa Cəlilin həyatına və nailiyyətlərinə həsr olunmuşdu. Ədəbi-musiqili tamaşada tatar, rus və Azərbaycan dillərində şeirlər və mahnılar səsləndirilib.
Tədbirdə K. Nasiri Mərkəzinin tələbələri, “Ak Kalfak”, “Azərbaycanın Tatar İcması”, “Lalya” tatar mahnı ansamblının nümayəndələri və yaradıcı gənclər iştirak edirdilər. Proqramda uşaq tamaşaları bölməsinə xüsusi yer ayrılıb. Gənc iştirakçılar nəsillərin davamlılığını və mədəni yaddaşın qorunmasını nümayiş etdirərək rəqs, şeir və ədəbi kompozisiyalar təqdim ediblər.
Proqram M.Cəlilin poeziyasına əsaslanan “Mənim nəğmələrim” mahnısının birgə ifası və şairin qəhrəmanlığına həsr olunmuş yeni “Kara urman” bədii filminin nümayişi ilə başa çatıb.
