Hər il fevralın 15-i dünyanın bir çox ölkəsində Beynəlxalq Uşaq Xərçəng Xəstəlikləri Günü və ya Beynəlxalq Uşaq Xərçəng Xəstəlikləri ilə Mübarizə Günü kimi qeyd olunur. 2001-ci ildən tibbi təqvimə daxil edilən bu gün hazırda Beynəlxalq Uşaq Onkologiyası Cəmiyyətinin himayəsi altında beş qitədəki 94 ölkədə, o cümlədən Azərbaycanda da qeyd edilir.İlk dəfə 2002-ci yanvarın 15-də Lüksemburqda keçirilsə də sonradan fevralın 15-nə təyin edilməsi qərara alınıb.
“Tehsil365“AZƏRTAC-a istinadən xəbər verir ki, bu, uşaq xərçəng xəstəlikləri haqqında məlumatlılığı artırmaq və xərçəng xəstəsi olan uşaqlara və onların ailələrinə dəstək olmaq üçün qlobal əməkdaşlıq kampaniyasıdır. Günün əsas ideyası ondan ibarətdir ki, xərçəng xəstəliyinə tutulmuş hər bir uşaq və yeniyetmə milliyyətindən, irqindən, maddi vəziyyətindən və ya sosial statusundan asılı olmayaraq ən yaxşı tibbi və psixososial yardıma, erkən və düzgün diaqnoz qoyulması, həyati əhəmiyyətli dərmanların alına bilməsi, müvafiq keyfiyyətli müalicə almaq hüququ, eləcə də sonrakı qayğı, xidmətlər və sabit dolanışığın təmin edilməsi hüququna malik olmalıdır.
Hər il təxminən 100 min uşaq xərçəngdən dünyasını dəyişir
Bu təqvim günündə qeyd olunan məsələ təəssüf ki, getdikcə daha çox əhəmiyyət kəsb edir. Ümumdünya Səhiyyə Təşkilatının (ÜST) məlumatına görə, hər il dünyada 20 yaşdan kiçik 400 mindən çox uşaq və yeniyetməyə xərçəng diaqnozu qoyulur. Hər il təxminən 100 min uşaq xərçəngdən dünyasını dəyişir.
Vaxtında diaqnoz xərçəng müalicəsinin uğurlu olmasının açarı hesab olunur. Xəstəlik I və ya II mərhələlərdə aşkar edilərsə, müalicə çox vaxt əlverişli nəticəyə gətirib çıxarır. Lakin xərçəng hallarının onda biri yalnız III mərhələdə, uşaqların səkkiz faizi isə yalnız IV mərhələdə aşkar edilir.
Uşaqlarda rast gəlinən onkoloji xəstəliklər bütün bədxassəli şişlərin 1-1,5 faizini təşkil edir və onlar böyüklərdə rast gəlinən onkoloji xəstəliklərdən çox fərqlidir. Onlar arasında ən çox yayılmış xərçəng növlərinə leykemiya, bədxassəli beyin şişləri, limfomalar, neyroblastomalar və nefroblastomalar daxildir. Böyüklərdə təsadüf edilən xərçəng xəstəlikləri (mədə-bağırsaq, ağciyər, süd vəzi və s.) uşaqlarda çox nadir hallarda rast gəlinir. Müasir müalicə metodları uşaq onkologiyasında daha yaxşı nəticə verir və uşaqların böyük əksəriyyətində tam sağalmaya nail olmaq mümkündür.
Onkoloji xəstəliklərdən əziyyət çəkən uşaqların problemləri təkcə onların valideynlərinin problemləri deyil. Bunlar bütün səhiyyənin, dövlət və qeyri-dövlət qurumlarının, ümumiyyətlə, cəmiyyətin problemləridir.
Lakin həkimlər hələ də uşaqlar arasında yayılan xərçənginin dəqiq səbəblərini müəyyən edə bilmirlər. Yalnız genetik meyil, dölün inkişafı zamanı dölün anomaliyaları, kanserogen təsirlərə məruz qalma (ətraf mühitin çirklənməsi, ətraf mühitdəki zəhərli maddələr), müəyyən xroniki infeksiyalar (HİV, Epstein-Barr virusu və malyariya) və digərləri daxil olmaqla meyillər və risk faktorları məlumdur.
Həkimlərin lazımi diaqnostik avadanlıqlara malik olduğu inkişaf etmiş ölkələrdə xərçəng xəstəsi olan hər dörd uşaqdan üçü hazırda sağalır. Xərçəng xəstəsi olan uşaqların 80 faizinin yaşadığı inkişaf etməkdə olan ölkələrdə isə vəziyyət tam əksinədir
Milli Onkologiya Mərkəzinin Uşaq Onkoloji Klinikası regionda uşaqlara keyfiyyətli tibbi yardım göstərən yeganə tibb müəssisəsidir
2012-ci il martın 7-də Milli Onkologiya Mərkəzinin nəzdində ölkəmizdə ilk dəfə Uşaq Onkoloji Klinikası fəaliyyətə başlayıb. Uşaq Onkoloji Klinikasının yaradılmasında Azərbaycan Respublikasının Birinci vitse-prezidenti Mehriban xanım Əliyevanın və Milli Onkologiya Mərkəzinin direktoru, akademik Cəmil Əliyevin böyük əməyi var. Hazırda həmin klinika regionumuzda onkoloji xəstəliklərdən əziyyət çəkən uşaqlara ixtisaslaşmış, yüksək texnologiyalarla təchiz olunmuş keyfiyyətli tibbi yardım göstərən yeganə tibb müəssisəsidir. Klinikada beynəlxalq protokollara uyğun olaraq, kompleks müalicənin bütün növləri mükəmməlliklə icra edilir, o cümlədən, kimya terapiyası, şüa terapiyası, cərrahi müalicə, immunoterapiya və s. aparılır. Uşaq Onkoloji Klinikasında ambulator və poliklinik şöbə, kimya terapiyası, cərrahiyyə, anestezioloji-reanimatoloji və şüa terapiyası şöbələri fəaliyyət göstərir.
Qızıl lent uşaqlıq xərçənginə qarşı mübarizəni simvolizə edir. Bu, uşaqlarının valideynlər üçün nə qədər qiymətli bir xəzinə olduğunu simvollaşdırır.
Xatırladaq ki, hər il fevralın 4-ü Ümumdünya Xərçənglə Mübarizə Günü qeyd olunur.