“Biz psixoloqlar müraciət edən şəxsin öz daxili dünyalarını anlamaq üçün yardım edən insanlarıq.” – deyə Nabat Mirzəyeva vurğulayıb.
Psixoloq Nabat Mirzəyeva “Təhsil365”ə açıqlamasında bildirib ki, psixoloq etikası müraciət edən şəxsin məxfiliyinin qorunmasını, tibbi diaqnoz və dərman təyini kimi səlahiyyətlərdən uzaq durmağı, emosional və şəxsi asılılıq yaratmamağı, pasiyenti utandırmamağı və mühakimə etməməyi tələb edir. Onun sözlərinə görə, terapevtik münasibətlərdə sərhədlərin pozulması, şəxsi maraqların önə çəkilməsi və seans vaxtlarına riayət olunmaması etik qaydaların pozulması deməkdir.
Psixoloq Nabat Mirzəyeva “Təhsil365” açıqlamasında psixoloq etikası ilə bağlı vacib məqamlara toxunub. O bildirib ki, psixoloqa müraciət edən şəxsin danışdıqları, şəxsiyyəti və kimliyi mütləq şəkildə məxfi saxlanılmalıdır:
“Üçüncü şəxslərin pasiyentin kimliyi və söylədikləri barədə məlumat alması etik qaydanın pozulmasıdır.”
Mirzəyeva əlavə edib ki, psixoloqlar tibbi diaqnoz qoymaq və dərman tövsiyə etmək səlahiyyətinə malik deyillər. Onun sözlərinə görə, bu cür yanaşmalar etik çərçivədən kənara çıxmaq deməkdir. Ekspert vurğulayıb ki, psixoloqun öz emosional və şəxsi ehtiyaclarını terapevtik münasibətlərə daşıması, pasiyent üzərində emosional, maddi və şəxsi asılılıq yaratması yolverilməzdir.
“Pasiyenti utandırmaq, qorxutmaq, mühakimə etmək, duyğu və düşüncələrini heçə saymaq doğru deyil. Psixoloq müraciət edən şəxsin duyğularını anlamağa kömək etməlidir, onu yönləndirmək və öz baxış bucağına uyğun istiqamətləndirmək etik qaydaların pozulmasıdır.”
Mirzəyeva həmçinin sərhədlərin qorunmasının vacibliyini qeyd edib:
“Pasiyent və psixoloq arasında dostluq, yaxınlıq və sevgi münasibətləri olmamalıdır. Bu, etik çərçivəyə ziddir. Seans vaxtlarına riayət etmək də vacibdir. Əlbəttə, çox ciddi hadisələr baş vermədiyi zamanlar istisna olmaqla, seansların tez-tez ləğv olunması etik davranış deyildir.”
Psixoloqun sözlərinə görə, etik qaydaların əsas məqsədi pasiyentin qorxudulmadan, utandırılmadan, tənqid edilmədən öz daxili duyğularını anlamağa və onları ifadə etməyə şərait yaratmaqdır.