Bu gün Azərbaycan professional musiqi teatrının banilərindən biri, görkəmli opera sənətkarı Hüseynqulu Sarabskinin xatirə günüdür.
"Tehsil365" xəbər verir ki, 1879-cu il martın 20-də Bakıda anadan olan Rzayev Hüseynqulu Məlik oğlu Azərbaycan opera sənətinin formalaşmasında mühüm rol oynamış, lirik tenor kimi böyük şöhrət qazanmışdır. O, 1932-ci ildə Azərbaycanın xalq artisti fəxri adına layiq görülmüşdür.
Hüseynqulu Sarabski 1908-ci ildən “Nicat” cəmiyyəti nəzdində yaradılan “Müsəlman Opera truppası”nın yaradıcılarından və solistlərindən biri olmuşdur. 1908-ci il yanvarın 25-də dahi bəstəkar Üzeyir Hacıbəylinin müəllifi olduğu Leyli və Məcnun operasının ilk tamaşasında Məcnun rolunu ifa edərək Azərbaycan opera tarixində silinməz iz qoymuşdur.
Sənətkar yaradıcılığı boyu bir sıra klassik opera obrazlarını ustalıqla canlandırmışdır. Onun repertuarında Məcnun (“Leyli və Məcnun”), Şeyx Sənan (“Şeyx Sənan”), Kərəm (“Əsli və Kərəm”), Sərvər (“O olmasın, bu olsun”), Şah İsmayıl (“Şah İsmayıl”) kimi partiyalar xüsusi yer tutmuşdur. Bu rollar Azərbaycan səhnə sənətinin qızıl fonduna daxil olmuşdur.
Hüseynqulu Sarabski həm də aktyor, rejissor və pedaqoq kimi fəaliyyət göstərərək milli teatr sənətinin inkişafına böyük töhfələr vermişdir. O, 1945-ci il fevralın 16-da Bakıda vəfat etmişdir.
Onun zəngin sənət irsi bu gün də Azərbaycan musiqi və teatr mədəniyyətinin ayrılmaz hissəsidir.