Azərbaycanın tarixi, mədəniyyəti və müasir inkişaf mərhələlərini beynəlxalq auditoriyaya təqdim edən “İRS-Heritage” jurnalının ingilis dilində növbəti nömrəsi nəşr olunub.
“Tehsil365” xəbər verir ki, jurnalın baş redaktoru Musa Mərcanlının giriş məqaləsində Azərbaycan xalqının Vətən müharibəsində əldə etdiyi tarixi Qələbənin beş illiyi, postmüharibə dövründə Qarabağ və Şərqi Zəngəzurda həyata keçirilən genişmiqyaslı bərpa-quruculuq işləri və regionda formalaşan yeni reallıqlar təhlil edilir.
Nömrənin əsas mövzularından biri Misirin Ayn Şams Universitetinin professoru Ahmad Sami Elaydi tərəfindən qələmə alınmış “İkinci Qarabağ müharibəsindən beş il sonra: Qələbə, bərpa və sülhə aparan yol” adlı analitik məqalədir. Yazıda Azərbaycanın hərbi-siyasi Qələbəsinin regional təhlükəsizlik, iqtisadi inkişaf və sülh perspektivləri baxımından əhəmiyyəti geniş şəkildə şərh olunur.
Jurnalın “Diqqət mərkəzində – Azərbaycan” bölməsində Perunun San-Markos Milli Universitetinin Asiya Araşdırmaları Mərkəzinin direktoru, professor Carlos Aquino Rodriguez tərəfindən hazırlanmış məqalədə Orta Dəhlizin – Trans-Xəzər Beynəlxalq Nəqliyyat Marşrutunun qlobal ticarətdə artan rolu araşdırılır. Müəllif Azərbaycanın Şərqlə Qərb arasında strateji nəqliyyat-logistika qovşağı kimi mövqeyini xüsusi vurğulayır.
İncəsənət bölməsində Aysel Salamovanın “Mirzə Qədim İrəvani və onun yaradıcılıq irsi” adlı məqaləsi təqdim olunub. Materialda XIX əsr Azərbaycan təsviri sənətinin banilərindən olan sənətkarın portret janrının inkişafındakı rolu, realist üsluba keçid mərhələsi və bədii irsi elmi aspektdən təhlil edilir.
Tarix bölməsində britaniyalı tədqiqatçı İan Peartın məqaləsində Ermənistanın hərbi təcavüzü nəticəsində doğma yurdlarından didərgin düşmüş azərbaycanlıların taleyi, xüsusilə Xocalı faciəsi, məcburi köçkünlərin xatirələri və müharibədən sonrakı dirçəliş prosesi təsvir edilir.
Jurnalın “Keçmişdən gələnlər” bölməsində tarix üzrə fəlsəfə doktoru Məlaikə Hüseyn tərəfindən qələmə alınmış “Məmməd ağa Şahtaxtlı. Azərbaycan jurnalistikasının görkəmli nümayəndəsi” adlı məqalə yer alıb. Materialda XIX–XX əsrin əvvəllərində Azərbaycan milli mətbuatının formalaşmasında mühüm rol oynamış maarifçi ziyalının publisistik fəaliyyəti, elmi baxışları və ictimai fikrin inkişafındakı xidmətləri geniş tarixi faktlar əsasında təhlil olunur.
Jurnalın arxeologiya bölməsində Zəminə Rəsulova tərəfindən qələmə alınmış Şəkinin Fazil kəndi və Təpəbaşı nekropolu ilə bağlı məqalədə Azərbaycanın qədim maddi-mədəni irsini əks etdirən arxeoloji tapıntılar və elmi araşdırmalar yer alıb.
“Azərbaycanı kəşf edirik” rubrikasında isə Səbinə Tumanskayanın “Sim: fantaziya dünyasında” adlı məqaləsi yer alıb. Yazıda Azərbaycanın təbiət və mədəniyyət baxımından özünəməxsus məkanlarından biri oxucuya fərqli, bədii-publisistik üslubda təqdim edilir, ölkənin turizm potensialı və estetik cazibəsi ön plana çəkilir.
Qeyd edək ki, “İRS-Heritage” jurnalının ingilis dilində nəşr olunan nömrələri dünyanın müxtəlif ölkələrində elmi, mədəni və akademik dairələrdə yayılaraq Azərbaycanın zəngin tarixi və mədəni irsinin beynəlxalq aləmdə tanıdılmasına mühüm töhfə verir.