1201-ci il fevralın 17-də görkəmli Azərbaycan alimi Nəsirəddin Tusi (1201–1274) dünyaya gəlib. O, astronom, riyaziyyatçı, filosof, tarixçi, maliyyəçi, ilahiyyatçı, hüquqşünas və dövlət xadimi kimi çoxşaxəli elmi fəaliyyəti ilə tanınıb.
“Tehsil365” xəbər verir ki, alimin yüzdən artıq fundamental əsəri astronomiya, riyaziyyat, fizika, tibb, fəlsəfə, etika və məntiq kimi müxtəlif elm sahələrini əhatə edib. Onun yaradıcılığında xüsusilə astronomiya və riyaziyyat üzrə tədqiqatlar mühüm yer tutur. Nəsirəddin Tusi Şərq dünyasında etikaya dair yazdığı Əxlaqi-Nasiri əsəri ilə geniş şöhrət qazanıb.
Alim həmçinin Marağa rəsədxanasının banisi kimi tarixə düşüb. Onun dörd hissədən ibarət Zici-İlxani (“İlxanilərin astronomik cədvəlləri”) əsəri isə dünya astronomiya tarixində xüsusi yer tutur.
Mənbələrə görə, görkəmli filosof hicri təqvimi ilə 47 il hakimiyyətdə olmuş xəlifə Nasir li-Dinillah üçün hazırlanmış, lakin müəyyən səbəblərə görə boş qalmış sərdabada dəfn olunub. Maraqlıdır ki, həmin sərdaba 1201-ci il fevralın 17-də – alimin doğulduğu gün tamamlanıb.