“Şəhər, rayon və ucqar ərazilərdə yerləşən məktəblər arasında müəyyən fərqlər var.”
Bu sözləri “Təhsil365”ə açıqlamasında təhsil eksperti Məzahir Məmmədli bildirib.
Ekspert qeyd edib ki, bu fərqlər müəllimlərin işə qəbulu və ixtisaslara vakansiyaların paylanması ilə bağlıdır. Onun sözlərinə görə, şəhərlərdə iş yerləri üçün yüksək bal toplayan, savadlı və istedadlı müəllimlər rəqabətdə qalır və şəhər məktəblərinə yerləşir. Rayonlara və ucqar ərazilərə isə daha az nəticə göstərən müəllimlər gedir.
“Müəllimlərin bilik və tədris bacarıqları nəticələrə təsir edir. Savadlı müəllimlərin tədris metodikası fərqlidir, az nəticə göstərən müəllimlərin yanaşması isə başqa cür olur. Bu baxımdan region və şəhər məktəbləri arasında fərqlər özünü göstərir”, – deyə o vurğulayıb.
Ekspert əlavə edib ki, yuxarı sinif şagirdlərinin repetitor xidmətlərindən istifadə imkanı da şəhər və region məktəbləri arasında fərqi artır. Şəhər şagirdləri hazırlıq kurslarına daha asan çıxış əldə edir, bəzi kurslar isə Dövlət İmtahan Mərkəzinin suallarını təxmin etməkdə təcrübəyə malikdir. Region məktəbləri isə bu imkanlardan məhrum olduğu üçün şagirdlər əlavə hazırlıq baxımından şanssızdır.
“Müəyyən fərqlər sadəcə coğrafi mövqedən qaynaqlanır, amma nəticədə bu, tədris prosesinə və şagirdlərin hazırlığına təsir edir”, – deyə Məzahir Məmmədli fikrini yekunlaşdırıb.