Azərbaycanda magistratura səviyyəsinə marağın azalması müşahidə olunur. Bu il magistraturaya sənəd verən 22 780 nəfərdən 509-u imtahanda iştirak etməyib. Bu göstərici artıq ilkin mərhələdə müəyyən qədər imtina hallarının olduğunu göstərir.
Təhsil eksperti Məzahir Məmmədli “Tehsil365”-ə verdiyi açıqlamada bildirib ki, son iki ildə – 2023–2024 və 2024–2025-ci tədris illərində də magistratura üzrə xeyli sayda boş plan yerləri qalıb. Onun sözlərinə görə, bəzi abituriyentlər magistraturanı qazansalar da, sonradan qeydiyyatdan keçməyərək təhsildən imtina ediblər.
Ekspert bu tendensiyanı əmək bazarında magistr diplomuna olan tələbin zəifliyi ilə əlaqələndirib. O qeyd edib ki, işəgötürən müəssisələr əksər hallarda magistr dərəcəsini əsas şərt kimi irəli sürmürlər və bu da bakalavr məzunlarının motivasiyasına təsir göstərir.
Məzahir Məmmədli həmçinin plan yerlərinin çoxluğu məsələsinə də toxunub. O vurğulayıb ki, bəzi özəl universitetlərin maddi-texniki bazası tələb olunan standartlara cavab verməsə də, magistratura üzrə çoxsaylı plan yerləri təklif etməsi ümumi marağa mənfi təsir göstərir.
Ekspert əlavə edib ki, Dövlət İmtahan Mərkəzinin magistratura imtahanlarına esse tipli suallar əlavə etməsi də müəyyən qədər tərəddüd yaradır. Hazırda elan olunan nəticələrin yalnız test tapşırıqlarına aid olduğunu, esse cavablarının isə 6–7 həftə sonra açıqlanacağını qeyd edən Məmmədli bu amilin də bəzi bakalavrların magistraturaya can atmamasına səbəb olduğunu bildirib.
O, sonda vurğulayıb ki, elmi fəaliyyətlə məşğul olmaq istəyənlər üçün magistratura və doktorantura mühüm mərhələdir. Lakin mövcud motivasiya çatışmazlığı gələcəkdə doktorantura pilləsinə marağın da azalmasına gətirib çıxara bilər.