“Ramazan bayramı islam dünyasının iki böyük mənəviyyat bayramından biridir və onun qeyd olunması şagird və tələbələrə milli-mənəvi dəyərlərin aşılanması baxımından əhəmiyyət daşıyır.”
Bu sözləri "Tehsil365"ə açıqlamasında ilahiyyatçı Hacı Təyyar Hüseynli deyib.
İlahiyyatçı bildirib ki, milli bayramların və mənəvi dəyərlərin təbliği məktəbəqədər dövrdən ali təhsil səviyyəsinə qədər nəzərdə tutulan məsələlərdəndir və gələcək nəsillərin milli-dini dəyərlər üzərində formalaşması cəmiyyət üçün müsbət nəticələr verir.
“Ramazan bayramını qeyd etmək, şagird və tələbələrə bunu aşılamaq və bayram əhval-ruhiyyəsi ilə məscidlərə getmək müsbət haldır. Ramazan və Qurban bayramları dövlət səviyyəsində qeyri-iş günü kimi qeyd olunursa, şagird və tələbələrin də bu bayramı hiss etməsi təbii qarşılanmalıdır”, – deyə o vurğulayıb.
Hacı Təyyar Hüseynli qeyd edib ki, bu məsələ ixtiyari xarakter daşıyır və valideynlərin mövqeyi, ailə şəraiti və sosial vəziyyət nəzərə alınmalıdır. Onun sözlərinə görə, məscidlərə getmək istəyən şagird və tələbələrin iştirak etməsində problem görülmür.
“Şagird və tələbələrin məscidlərə getməsi islam dininin təbliği hesab olunur. İslam dini milli-mənəvi dəyərlərlə uyğunlaşan yüksək ilahi dəyərləri özündə birləşdirir və cəmiyyətin mənəviyyat sektorunun bir hissəsidir. Bu sahədə əsas şərt elmdir, çünki islamın ilk çağırışlarından biri oxumaq və təhsil almaqdır”, – deyə o bildirib.
İlahiyyatçı əlavə edib ki, bu mövzuda fərqli ictimai fikirlər mövcud olsa da, dini fəaliyyətlərin təhsilə mənfi təsir göstərmədiyi halda şagird və tələbələrin məscidlərə getməsi mənfi qiymətləndirilməməlidir. Onun fikrincə, ailələr övladlarının milli-mənəvi dəyərlər üzərində formalaşmasını istəyir və bu baxımdan məscidlər mənəvi mühit yaradan məkan kimi qəbul olunur.
“Əgər təhsilin mənəvi tələbləri ilə islamın mənəvi dəyərləri bir-birini tamamlayırsa, elm ocaqları da, məscidlər də gənclərin sağlam cəmiyyət üzvü kimi formalaşmasına xidmət edir”, – deyə o vurğulayıb.