Ailə insan psixologiyasının formalaşdığı ilk və ən əsas mühitdir. İnsan dünyanı, münasibətləri, sevgini, təhlükəsizliyi və hətta öz dəyərini ilk olaraq ailədə öyrənir. Uşağın özünə inamı, emosiyalarını ifadə etmə bacarığı, stresslə mübarizə üsulları böyük ölçüdə ailədə gördüyü münasibət modelinə əsaslanır.
Psixoloq Nizami Orucov “Tehsil365”ə verdiyi açıqlamada bildirib ki, sağlam ailə mühiti insanda təhlükəsizlik və qəbul olunma hissi yaradır:
“Uşaq səhv etdikdə alçaldılmır, fikrini dedikdə susdurulmur, hisslərini ifadə etdikdə lağa qoyulmur. Bu cür mühitdə böyüyən insan daha stabil, empatik və sosial münasibətlərdə daha balanslı olur.”
Onun sözlərinə görə, əksinə, davamlı tənqid, laqeydlik, zorakılıq və ya emosional soyuqluq olan ailələrdə böyüyən uşaqlarda özünə dəyər hissi zəifləyə, aqressiya və ya həddindən artıq qapanma yarana bilər.
Psixoloq vurğulayıb ki, ailə həm də gələcək münasibətlərin “modeli”dir:
“İnsan böyüdükdə çox vaxt şüuraltı şəkildə uşaqlıqda gördüyü münasibət formasını təkrarlayır. Buna görə də ailə yalnız bioloji yox, psixoloji fundament rolunu oynayır. Sağlam psixologiyanın təməli çox vaxt sağlam ailə münasibətlərində qoyulur.”