“İngilis dili bu gün təhsil və karyera üçün ən vacib dillərdən biridir, lakin bir çox şagird və tələbə bu dili öyrənərkən müəyyən çətinliklərlə qarşılaşır.”
Bu sözləri "Tehsil365"ə açıqlamasında ingilis dili müəllimi,pedaqoq Lamiyə Quliyeva bildirib.
Pedaqoq qeyd edib ki, danışıq zamanı səhv etmək qorxusu öyrənənlərin sərbəst danışmasına mane olur və bu, ən çox rast gəlinən problemlərdən biridir.
“Ən əsas çətinliklərdən biri danışıq zamanı səhv etmək qorxusudur. Bu qorxu onların sərbəst danışmasına mane olur.”
Onun sözlərinə görə, söz ehtiyatının kifayət qədər olmaması da dil öyrənmədə ciddi çətinlik yaradır.
“Şagirdlər yeni sözləri öyrənsələr də, onları praktikada istifadə etmədikdə tez unudurlar.”
Lamiyə Quliyeva vurğulayıb ki, qrammatika qaydaları və dinləmə bacarıqları da bəzi öyrənənlər üçün çətin görünür.
“Qrammatika qaydaları bəzən mürəkkəb qəbul olunur, dinləmə zamanı sürətli danışıq və fərqli tələffüz formaları başa düşməyi çətinləşdirir.”
O əlavə edib ki, motivasiya və davamlı praktikanın olmaması da öyrənmə prosesinə təsir edən əsas amillərdəndir.
“Dil öyrənmək üçün davamlı məşq və səbr vacibdir. Şagird və tələbələr daha çox praktika etməli, səhv etməkdən qorxmamalı və ingilis dilini gündəlik həyatda istifadə etməyə çalışmalıdırlar.” - deyə o fikrini yekunlaşdırıb.