Bakı Dövlət Universiteti (BDU) və “BP Eksploreyşn (Kaspian Si) Limited” arasında əməkdaşlıq müqaviləsi imzalanıb. Sazişin əsas məqsədi universitet ekosisteminin gücləndirilməsi, biliklərin artırılmasına dəstək verilməsi və uzunmüddətli akademik inkişaf üçün şəraitin yaradılmasıdır.
“Tehsil365“ xəbər verir ki,BDU rektoru Elçin Babayev mərasimdə çıxış edərək bp ilə əməkdaşlığı universitet-sənaye tərəfdaşlığının nümunəsi kimi dəyərləndirib. O, bp-nin regionda iqtisadi və biznes layihələri ilə yanaşı, sosial sahəyə verdiyi töhfələri xüsusi vurğulayıb. Rektor qeyd edib ki, son beş ildə BDU-da bp-nin dəstəyi ilə üç layihə həyata keçirilib: 2021-ci ildə BDU Nəşr Evi yenidən qurulub.2024-cü ildə Faydalı qazıntılar muzeyi əsaslı təmir olunaraq rəqəmsallaşdırılıb.Bu gün istifadəyə verilən Elmi Kitabxananın elektron bölməsi isə təhsil və elmin inkişafı üçün mühüm addım hesab olunur.
Yeni rəqəmsal kitabxana tələbə və müəllimlərə geniş bilik bazasına məsafədən çıxış imkanı yaradacaq, həmçinin beynəlxalq elmi bazalara inteqrasiyanı təmin edəcək.
bp-nin Azərbaycan, Gürcüstan və Türkiyə üzrə regional prezidenti Cio Kristofoli BDU-nun müasir rəqəmsal kitabxana sisteminə keçidini dəstəkləməkdən məmnunluğunu ifadə edib. O bildirib ki, biliklərə çıxış uğurlu təhsil prosesinin əsasını təşkil edir və bu layihə tələbələr, müəllimlər və tədqiqatçılar üçün öyrənmə və innovasiya baxımından yeni platforma yaradır.
Kristofoli əlavə edib ki, BDU-nun kitabxanasında 2,5 milyon nadir kitab, əlyazma və tarixi sənəd saxlanılır. Yeni sistem müasir arxivləşdirmə və inventar idarəetməsi təcrübələri ilə bu fondun qorunmasına və gələcək nəsillərə ötürülməsinə töhfə verəcək.
Bu əməkdaşlıq bp-nin Azərbaycanda ali təhsilin və elmi tədqiqatların keyfiyyətinin artırılmasına verdiyi dəstəyin növbəti nümunəsi kimi qiymətləndirilir. Tərəflər gələcəkdə də birgə layihələrin həyata keçiriləcəyinə əminlik ifadə ediblər.
