Qış aylarında bir çox insan soyuqdəymə, qrip və COVID-19-un oxşar əlamətləri ilə qarşılaşır və buna görə düzgün diaqnoz qoymaq çətinləşir.
“Tehsil365“ Lent.az-a istinadən xəbər verir ki, hansı xəstəliyə tutulduğumuzu tez müəyyənləşdirməyə və vaxtında həkimə müraciət üçün kömək edən aydın əlamətlər var.
Xəstəlikləri ayırd etməyin ən sadə yollarından biri onların inkişaf sürətinə diqqət yetirməkdir. Qrip adətən qəfil başlayır – bir neçə saat ərzində yüksək hərarət və güclü halsızlıq yaranır.
COVID-19 isə yüngül əlamətlərlə başlayıb tədricən güclənə bilər.
Soyuqdəymə daha yavaş inkişaf edir və adətən daha yüngül keçir.
Daha çox COVID-ə işarə edən əlamət
Nəfəs darlığı soyuqdəymə və ya qrip zamanı nadir hallarda müşahidə olunur, lakin koronavirus infeksiyası üçün daha xarakterikdir, çünki bu xəstəlik ağciyərlərə daha güclü təsir edir. Bununla belə, nəfəs almaqda çətinlik qripin ağırlaşmaları zamanı, məsələn, pnevmoniya səbəbindən də yarana bilər.
Öskürəyə də diqqət yetirin. Öskürəyin xarakteri düzgün nəticə çıxarmağa kömək edə bilər:
yüngül öskürək və boğaz ağrısı daha çox soyuqdəymə ilə əlaqələndirilir;
quru öskürək və vəziyyətin kəskin pisləşməsi qrip üçün tipikdir;
uzunmüddətli, fasiləsiz öskürək, həmçinin qoxu və ya dad hissinin itməsi COVID-19-un yayılmış əlamətləridir.
Əlamətlər varsa, nə etməli?
Həkimlər yüksək hərarət olduqda və ya özünüzü işləmək və ya oxumaq üçün kifayət qədər yaxşı hiss etmədikdə evdə qalmağı və təmasları minimuma endirməyi tövsiyə edirlər. Gündəlik həyata yalnız vəziyyət yaxşılaşdıqdan sonra qayıtmaq məsləhətdir.