AMEA-nın Mərkəzi Elmi Kitabxanasının (MEK) fondlarına yeni daxil olan ədəbiyyatın sərgisi təşkil olunub.
MEK-dən “Tehsil365”ə bildirilib ki, sərgidə müxtəlif elm sahələrini əhatə edən monoqrafiyalar, dərsliklər, ensiklopedik nəşrlər və xarici dillərdə işıq üzü görmüş kitablar nümayiş olunur.
Nəşrlərin sırasında “Suverenliyin Zəfər yolu: reallaşan ideyalar, hüquqi əsaslar, siyasi paralellər”, “Qarabağ və Şərqi Zəngəzur. Geologiya və mineral resurslar”, “Biotorpaq: Elmlə yaşayan kənd təsərrüfatı” mövzusunda Respublika elmi-praktik konfransın materialları, “Ortodontiya. Təməl biliklər”, “Rəqəmsal ödənişlər və elektron bankçılıq xidmətləri”, “İdarəetmə nəzəriyyəsi”, “İqtisadi-riyazi modellər və üsullara aid məsələlər, alqoritmlər və proqramlar”, “Kənd təsərrüfatı terminlərinin izahlı lüğət” və digərləri var. Bundan əlavə, Azərbaycan xalqının Ümummilli Lideri Heydər Əliyevin mənalı həyat yolu və zəngin dövlətçilik irsi, ölkəmizə rəhbərliyi dövrlərdə xalqımız və dövlətimiz qarşısında misilsiz xidmətləri, ədliyyə sisteminə daim diqqət və qayğısı, Ulu Öndərin siyasi kursunun Prezident İlham Əliyev tərəfindən uğurla davam etdirilərək qazanılan yüksək nailiyyətlər və parlaq qələbələr barədə məlumatların əksini tapdığı “Heydər Əliyev və Azərbaycan ədliyyəsi” kitabı da sərgidə nümayiş etdirilir.
Qeyd edək ki, sərginin məqsədi oxucuları kitabxananın yenilənən resursları ilə yaxından tanış etmək, elmi araşdırmalara marağı artırmaq, elmi mühitdə məlumat mübadiləsini gücləndirmək və tədqiqatçılar üçün aktual mənbələrə əlçatanlığı artırmaqdır.
Sərgi iki həftə davam edəcək.