Regionlarda təhsil keyfiyyətinin artırılması məsələsi son illər dövlət siyasətinin əsas prioritet istiqamətlərindən biri kimi müəyyənləşdirilib. İnfrastrukturun yenilənməsi, müəllim potensialının gücləndirilməsi və qiymətləndirmə mexanizmlərinin təkmilləşdirilməsi istiqamətində atılan addımlar ictimai maraq doğurur.
Mövzu ilə bağlı Milli Məclisin deputatı Elnarə Akimova “Tehsil365"ə açıqlama verib.
Deputat bildirib ki, “Region məktəblərində təhsil keyfiyyətinin yüksəldilməsi dövlət təhsil siyasətinin prioritet istiqamətlərindəndir və bu sahədə sistemli tədbirlər həyata keçirilir. İlk növbədə, müəllim potensialının gücləndirilməsi məqsədilə regionlarda fəaliyyət göstərən pedaqoqlar üçün davamlı ixtisasartırma proqramları təşkil olunur, sertifikatlaşdırma prosesi mərhələli şəkildə tətbiq edilir və nəticələrə əsaslanan əməkhaqqı mexanizmi genişləndirilir. Bu yanaşma müəllimlərin peşəkar inkişafını stimullaşdırmaqla yanaşı, tədrisin keyfiyyətinə birbaşa təsir göstərir.”
Onun sözlərinə görə, məktəblərin maddi-texniki bazasının yenilənməsi istiqamətində də mühüm işlər görülür: “Son illərdə yüzlərlə təhsil müəssisəsi əsaslı təmir olunub, yeni məktəb binaları inşa edilib, laboratoriya və fənn kabinetləri müasir avadanlıqlarla təmin olunub. Region məktəblərinin sürətli internetə çıxışı genişləndirilib, rəqəmsal tədris resurslarından istifadə imkanları artırılıb, elektron jurnal və platformalar vasitəsilə idarəetmədə şəffaflıq gücləndirilib.”
Deputat qeyd edib ki, şagird nailiyyətlərinin obyektiv qiymətləndirilməsi məqsədilə milli qiymətləndirmə mexanizmləri də təkmilləşdirilir: “Buraxılış və monitorinq imtahanlarının nəticələri əsasında məktəblər üzrə inkişaf planları hazırlanır. Aşağı nəticə göstərən məktəblər üçün hədəfli metodiki dəstək proqramları tətbiq olunur, təlim nəticələrinə görə fərqləndirilmiş yanaşma formalaşdırılır.”
Elnarə Akimova əlavə edib ki, regionlarda məktəbəqədər təhsilin əhatə dairəsinin genişləndirilməsi, inklüziv təhsilin inkişafı, psixoloji xidmətlərin gücləndirilməsi və valideyn-məktəb əməkdaşlığının artırılması istiqamətində də ardıcıl addımlar atılır.
“Görülən tədbirlərin məqsədi regionlar üzrə təhsil imkanları arasında fərqləri minimuma endirmək və hər bir şagird üçün keyfiyyətli təhsilə bərabər çıxışı təmin etməkdir”, – deyə deputat vurğulayıb