Azərbaycanın görkəmli bəstəkarı, SSRİ xalq artisti Fikrət Məşədi Cəmil oğlu Əmirovun xatirəsi ehtiramla yad edilir.
"Tehsil365" xəbər verir ki, 1922-ci il noyabrın 22-də Gəncə şəhərində anadan olan sənətkar 1984-cü il fevralın 20-də Bakıda vəfat edib.
Fikrət Əmirov Azərbaycan professional musiqi sənətinin inkişafında mühüm rol oynayıb. O, müxtəlif illərdə Azərbaycan Dövlət Opera və Balet Teatrının direktoru (1956–1959), Azərbaycan Dövlət Filarmoniyasının bədii rəhbəri (1947), eləcə də Azərbaycan Bəstəkarlar İttifaqının katibi vəzifələrində çalışıb.
Bəstəkar həmçinin Azərbaycan SSR Ali Sovetinin IV–IX çağırış deputatı seçilib, 1980-ci ildən Azərbaycan SSR Elmlər Akademiyasının müxbir üzvü olub.
Yaradıcılığı və ictimai fəaliyyəti yüksək qiymətləndirilən sənətkar Sosialist Əməyi Qəhrəmanı adına (1982) layiq görülüb, 1965-ci ildə SSRİ xalq artisti, 1958-ci ildə Azərbaycan SSR xalq artisti fəxri adlarını alıb. O, həmçinin SSRİ Dövlət mükafatı (1980), Azərbaycan SSR Dövlət mükafatı (1974), II dərəcəli Stalin mükafatı (1949) və Azərbaycan SSR Lenin komsomolu mükafatı (1967) laureatı olub.
Fikrət Əmirov iki dəfə “Lenin” ordeni (1959, 1982) və iki dəfə “Qırmızı əmək bayrağı” ordeni (1967, 1971) ilə təltif edilib.
Azərbaycan musiqi mədəniyyətində silinməz iz qoyan bəstəkarın irsi bu gün də yaşayır və yeni nəsil musiqiçilər üçün ilham mənbəyi olaraq qalır.