Bakı Dövlət Universitetində (BDU) 27 Mart – Elm Gününə həsr olunmuş tədbirlər çərçivəsində AMEA-nın müxbir üzvü, professor Könül Bünyadzadənin fəlsəfə ixtisasında təhsil alan tələbələr üçün “Sufi fenomenologiya: dövrümüzün yeni fəlsəfi sistemi” mövzusunda ustad dərsi təşkil olunub.
BDU-dan “Tehsil365"ə bildirilib ki, Könül Bünyadzadə tələbələrə bu istiqamətdə apardığı tədqiqatlar və “Sufi fenomenologiya” adlı ikicildlik əsəri haqqında məlumat verib. Qeyd edib ki, sufi fenomenologiya orta əsr Şərq fəlsəfəsi (sufizm) ilə çağdaş dövr fəlsəfəsinin (fenomenologiya) kəsişmə nöqtəsi üzərində qurulmuş, müasir dövrün tələblərinə uyğun yeni düşüncə qatlarını açan, ruh və məntiq arasında sintez yaratmaqla onu maddi dünya çərçivəsindən yüksəyə qaldıra bilən, mənəvi və mental keyfiyyətlərin kamilləşməsinə yönələn fəlsəfi sistemdir. O, tələbələri sufi fenomenologiyaya giriş, yeni fəlsəfənin əsasları, sufi fenomenoloji metodologiya və ağıl haqqında mülahizələrlə tanış edib. Yeni fəlsəfi sistemdə ruhani təcrübə ilə şüur təcrübəsinin vahid strukturu kontekstində varlıq problemi və idrak nəzəriyyəsinə yeni baxış bucağının irəli sürüldüyünü deyib.
Məruzəçi öz mahiyyətini dərk etmək, mənəviyyatla gerçəklik arasında sabit körpü qurmaq, fəlsəfənin müasir dövrdə rolunu anlamaq və dünyaya fərqli prizmadan baxmaq istəyənlər üçün sufi fenomenologiya təliminin mühüm əhəmiyyət daşıdığını qeyd edib.
Ustad dərsi zamanı tələbələri maraqlandıran suallar cavablandırılıb, mövzu üzrə müzakirələr aparılıb.
