Naxçıvan Dövlət Universitetində 2025/2026-cı tədris ilinin II yarısında təşkil olunacaq təcrübələrin başlanğıc konfransı keçirilib. Tədbirdə təcrübə keçiriləcək müxtəlif müəssisələrin nümayəndələri, universitetin professor-müəllim heyəti və tələbələr iştirak ediblər.
Bu barədə "Tehsil365"ə Naxçıvan Dövlət Universitetindən məlumat verilib. Bildirilib ki,
Universitetin rektoru Elbrus İsayev konfransı giriş sözü ilə açaraq pedaqoji və istehsalat təcrübəsinin, eləcə də universitet-sənaye əməkdaşlığının peşəkar kadr hazırlığında mühüm rol oynadığını vurğulayıb. Rektor bildirib ki, NDU regionun əmək bazarının tələblərinə uyğun ixtisaslı mütəxəssislər hazırlamaq potensialına malikdir. Əcnəbi professorların dəvət olunması, tələbələrin xaricdə staj keçməsi və sifariş əsasında seçmə fənlərin tədrisi peşəkar hazırlığa əhəmiyyətli töhfə verir. O, təcrübəyə başlayacaq tələbələrə uğurlar arzulayıb və bu mərhələni səmərəli keçirmələri ilə bağlı tövsiyələr verib.
Tədrisin təşkili şöbəsinin müdiri Aynurə Seyidova çıxışında təcrübələrin təşkilinə dair tələblər və qarşıda duran vəzifələr barədə məlumat verib. Qeyd olunub ki, 2025-2026-cı tədris ilinin ikinci yarısında universitetin 1708 nəfər buraxılış kurs tələbəsi təcrübədə iştirak edəcək. 68 ixtisas üzrə 1311 tələbə istehsalat təcrübəsinə cəlb olunacaq. Onlardan 1080-i əyani, 164-ü qiyabi, 67-si isə əlavə ali təhsil üzrə təhsil alır. Təcrübələrin müddəti 1, 4, 5, 14 və 20 həftə olacaq. 38 müəssisədə keçiriləcək istehsalat təcrübəsinə 130 müəllim rəhbərlik edəcək.
Bildirilib ki, 20 ixtisas üzrə 397 tələbə pedaqoji təcrübədə iştirak edəcək və bu prosesə 43 müəllim rəhbərlik edəcək. Təcrübə bazası kimi universitetin nəzdində Gimnaziya, Naxçıvan şəhərindəki 12 ümumtəhsil məktəbi və Babək rayonunun Şıxmahmud kənd tam orta məktəbi seçilib. Təcrübələrin təşkili məqsədilə universitetlə Naxçıvan Muxtar Respublikası Təhsil Nazirliyi arasında müqavilə imzalanıb.
Tibb fakültəsinin “Əczaçılıq və biokimya” kafedrasının müdiri Surə Rəhimova nəzəri biliklərin praktik tətbiqinin peşə bacarıqlarının formalaşması və iş mühitinə adaptasiya baxımından əhəmiyyətini qeyd edib. Heydər Əliyev adına tam orta məktəbin müəllimi Aysel Əsgərova isə pedaqoji təcrübənin tələbləri və müəllimlik peşəsinin əsasları barədə danışıb.
Konfrans təcrübə prosesinin məqsəd və vəzifələrinin aydın şəkildə müəyyənləşdirilməsi, tələbələrin peşə fəaliyyətinə daha hazırlıqlı başlaması baxımından əhəmiyyətli olub.
