Kərkük Mədəniyyət Dərnəyinin rəhbəri, araşdırmaçı-yazar, AMEA Nizami Gəncəvi adına Ədəbiyyat İnstitutunun fəxri doktoru, ictimai xadim Şəmsəddin Kuzəçi və Nizami Gəncəvi adına Ədəbiyyat İnstitutunun əməkdaşı filologiya üzrə fəlsəfə doktoru Orxan İsayev AMEA-nın Mərkəzi Elmi Kitabxanasının (MEK) qonağı olub. Şəmsəddin Kuzəçi “İraq-Türkman kitabxanası” guşəsinə “Mən Kərkükəm”, “Kərkükün rüzgarı”, “Kərkükün günəşi” adlı yeni kitablarını, Orxan İsayev isə həmmüəllifi olduğu “İraq-Türkman ədəbiyyatı tarixi” adlı monoqrafiyasını hədiyyə edib.
MEK-dən “Tehsil365"ə bildirilib ki, görüş zamanı MEK-in direktoru texnika elmləri doktoru Hüseyn Hüseynov İraq-türkman ədəbiyyatının görkəmli nümayəndələrinin əsərlərindən ibarət bu guşə barədə ətraflı məlumat verib. Direktor qarşılıqlı elmi-ədəbi əlaqələrin inkişaf etdirilməsinin böyük əhəmiyyət kəsb etdiyini vurğulayıb.
Şəmsəddin Kuzəçi ölkələrimiz arasında olan ortaq milli-mənəvi dəyərlərdən və qədim tarixi köklərdən danışıb.
Orxan İsayev isə həmmüəllifi olduğu monoqrafiyada türkmanların yazılı ədəbiyyatı ilə yanaşı, şifahi xalq ədəbiyyatının da öz əksini tapdığından bəhs edib.
