AMEA Folklor İnstitutu və Bakı Dövlət Universitetinin Filologiya fakültəsinin birgə təşkilatçılığı ilə 21 Fevral – Beynəlxalq Ana Dili Gününə həsr olunmuş “Ana dilinin saflığının qorunması: qloballaşma dövründə milli kimlik və dil” mövzusunda elmi sessiya keçirilib.
“Tehsil365” AZƏRTAC-a istinadən xəbər verir ki, institutdan bildirilib ki, sessiya Folklor Studiyası tərəfindən hazırlanmış “Ana dilimiz milli varlığımızdır” adlı videoçarxın nümayişi ilə başlanıb.
Elmi sessiyada Filologiya fakültəsinin dekanı, filologiya üzrə fəlsəfə doktoru dosent Elçin Məmmədov dilin saflığının qorunması ilə bağlı mövcud problemlərə toxunub. O bildirib ki, bu sahədə əsas çətinliklər daha çox təhsil prosesində və media mühitində özünü göstərir. Məktəblərdə dilin düzgün tədrisi və mediada ədəbi dil normalarına riayət olunması istiqamətində sistemli və məqsədyönlü tədbirlərin həyata keçirilməsi zəruridir. Universitet mühitində ana dilinin saflığının qorunmasının vacibliyindən danışan Elçin Məmmədov bildirib ki, bu işlər yalnız tədris prosesi ilə məhdudlaşmamalı, həm də elmi araşdırmalar, maarifləndirici tədbirlər və ictimai müzakirələr vasitəsilə davamlı şəkildə təşviq olunmalıdır.
AMEA Folklor İnstitutunun direktoru, filologiya elmləri doktoru Hikmət Quliyev bildirib ki, həm ötən il noyabr ayının 3-də AMEA-nın 80 illik yubiley tədbirində, həm də 2026-cı il yanvarın 5-də yerli telekanallara müsahibəsində Prezident İlham Əliyev dilin saflığının qorunması məsələsini xüsusi diqqətə çatdırdı. Hikmət Quliyev qeyd edib ki, bu çağırış bütün qurumların, o cümlədən, elm və təhsil sahəsində çalışan alim və mütəxəssislərin qarşısında mühüm vəzifələr qoyub. Bildirib ki, ana dilinin saflığının qorunması zahirən sadə görünsə də, əslində olduqca məsuliyyətli və çoxşaxəli məsələləri özündə ehtiva edir. Direktor vurğulayıb ki, hər bir dil spesifik inkişaf yolu keçmiş, daxili qanunauyğunluqlara malik açıq sistemdir və qloballaşma, rəqəmsallaşma prosesləri bu sistemdə yeni təzahürlər yaradır.
Elmi sessiyada “Azərbaycan ədəbi dili normaları və nitq mədəniyyəti”, “Qloballaşma şəraitində ədəbi dil və akademik yazı”, “Ərəb, fars və rus dillərindən dilimizə keçən termin və şəxs adlarında problemlər”, “Sosial şəbəkələrin Azərbaycan ədəbi dilinə təsirləri: dilin saflığının qorunması yolları”, “Folklor Azərbaycan ədəbi dilinin potensial qaynağı kimi” mövzusunda məruzələr dinlənilib.
Tədbirin sonunda iştirakçılar tərəfindən ana dilinin qorunması istiqamətində maarifləndirici fəaliyyətlərin gücləndirilməsinin, xüsusilə gənc nəsildə nitq mədəniyyətinin formalaşdırılmasının əhəmiyyəti qeyd edilib, bu sahədə elmi və praktiki əməkdaşlığın davam etdirilməsinin zəruriliyi vurğulanıb.