2026-cı ilin “Şəhərsalma və Memarlıq İli” elan edilməsi, əslində, şəhərlərə yalnız tikinti prizmasından baxmağın artıq kifayət etmədiyini göstərir. Şəhərsalma təkcə fiziki məkanın qurulması deyil. Bu, hüququn, ictimai münasibətlərin və ictimai etimadın məkan üzərində sistemli şəkildə təşkil olunmasıdır.
“Tehsil365" xəbər verir ki, Azərbaycan Memarlıq və İnşaat Universitetinin (AzMiU) PR və media bölməsinin rəhbəri Nicat Abdullayev Baş Prokurorluğun media nümayəndələri üçün keçirdiyi “İstintaq sirri və media: ictimaiyyətin məlumatlandırılması üzrə treninq”də çıxışı zamanı deyib.
Onun sözlərinə görə, şəhər mühiti insan davranışına birbaşa təsir göstərir. Şəhərsalma hüquq, ictimai idarəetmə və kommunikasiya ilə ayrılmaz şəkildə bağlıdır. N.Abdullayev daha sonra deyib: “Məhz buna görə biz “Hüquq + mühit + etimad” formulundan danışırıq. Hüquq — qaydaları və məsuliyyəti təmin edir. Mühit — bu qaydaların real həyatda tətbiq olunduğu məkanı formalaşdırır. Etimad isə vətəndaşın bu sistemə inanmasını təmin edən əsas sütundur. Bu üç komponentdən biri çatışmadıqda sağlam şəhərdən və sağlam cəmiyyətdən danışmaq çətindir.
Burada sosial məsuliyyət xüsusi rol oynayır. Dövlət qurumlarının, o cümlədən istintaq və nəzarət orqanlarının fəaliyyətində şəffaf və ölçülü kommunikasiya ictimai etimadın qorunmasına birbaşa təsir edir. 2026-cı il bu mənada təkcə “Şəhərsalma və Memarlıq İli” deyil, eyni zamanda, hüquqi mədəniyyətin, ictimai dialoqun və məsuliyyətli idarəetmənin ili olmalıdır”.