2025-ci ildə məktəbəqədər təhsil müəssisələrinə qəbul olunan uşaqlarla bağlı aparılan müşahidələr maraqlı tendensiyanı üzə çıxarıb.
"Tehsil365" xəbər verir ki, Pedaqoqların sözlərinə görə, yeni qəbul edilən uşaqların təxminən üçdə biri kitabdan düzgün istifadə qaydalarını bilmir.
Müəllimlər bildirirlər ki, bəzi uşaqlar kitabın səhifələrini çevirmək əvəzinə onları sanki telefon və ya planşet ekranı kimi sürüşdürməyə çalışırlar. Bu hal erkən yaşlardan rəqəmsal cihazlarla təmasın artmasının nəticəsi kimi qiymətləndirilir.
Təhsil mütəxəssisləri qeyd edirlər ki, ekranlarla erkən tanışlıq uşaqların vizual qavrayışını və texnoloji bacarıqlarını inkişaf etdirsə də, ənənəvi kitab oxuma vərdişlərinin formalaşmasına mənfi təsir göstərə bilər. Onların fikrincə, valideynlər ev şəraitində balans yaratmalı, uşaqlara həm çap məhsulları ilə, həm də rəqəmsal resurslarla düzgün və nəzarətli şəkildə tanışlıq imkanı verməlidirlər.
Psixoloqlar isə vurğulayırlar ki, kitabın fiziki olaraq vərəqlənməsi, toxunma və diqqət bacarıqlarının inkişafında mühüm rol oynayır. Bu səbəbdən məktəbəqədər mərhələdə uşaqlarda kitab mədəniyyətinin formalaşdırılması xüsusi əhəmiyyət daşıyır.
Mütəxəssislər hesab edirlər ki, rəqəmsal texnologiyalar müasir təhsilin ayrılmaz hissəsi olsa da, erkən yaş dövründə balanslı yanaşma gələcək oxu bacarıqlarının möhkəm təməlini yarada bilər.