Məktəbəqədər təhsil uşağın həm akademik, həm də sosial inkişafı üçün əsas mərhələ sayılır. Lakin ekspertlər vurğulayır ki, yalnız bağçada verilən təhsil kifayət deyil – valideynlərin rolu və evdə göstərdikləri dəstək uşağın inkişafını birbaşa təsir edir.
Mövzu ilə bağlı məktəbəqədər təhsil eksperti Töhfə Mustafayeva “Tehsil365"ə açıqlama verib.
Ekspert bildirib ki, “Məktəbəqədər yaş dövründə uşaqların öyrənmə qabiliyyətləri çox sürətli inkişaf edir. Valideynlərin evdə yaratdığı dəstək mühiti, gündəlik oyunlar və kiçik öyrədici fəaliyyətlər uşağın biliyini və sosial bacarıqlarını gücləndirir.”
Onun sözlərinə görə, valideynin iştirakı yalnız akademik bacarıqları artırmır, həm də uşağın emosional və sosial tərbiyəsinə müsbət təsir göstərir: “Uşaq valideynlə birlikdə öyrənərkən özünəinam və məsuliyyət hissi inkişaf edir. Bu mərhələdə valideynin diqqəti, sözü və davranışı uşağın gələcək öyrənmə motivasiyasına birbaşa təsir göstərir.”
Ekspert həmçinin qeyd edib ki, valideynlər uşağa yalnız dərs və tapşırıqlarla deyil, oyun və gündəlik həyat nümunələri ilə dəstək olmalıdır: “Sadə hərəkətlər – məsələn, evdə rəqəmlərlə, rənglərlə, oxuma və danışma fəaliyyətləri ilə məşğul olmaq – uşağın təhsilə marağını artırır və bağçada öyrəndiklərini möhkəmləndirir.”
Sonda ekspert vurğulayıb ki, “Məktəbəqədər təhsil yalnız bağçalarla məhdudlaşmamalıdır. Valideynin aktiv iştirakı və evdə göstərdiyi dəstək uşağın ümumi inkişafı üçün vacib və əvəzolunmazdır.”