Mədəniyyət nazirinin müavini, Xalq artisti Murad Hüseynov Avstriyaya səfəri çərçivəsində Vyana, Ayzenştadt, Zalsburq və İnnsbruk şəhərlərində beynəlxalq musiqi fondları, ali təhsil müəssisələri, musiqi məktəbləri, orkestr və musiqi menecmenti agentliyi, dizayn və memarlıq büroları rəhbərləri ilə görüş keçirib.
“Tehsil365" xəbər verir ki, M.Hüseynov Ayzenştadt şəhərində Beynəlxaq Yozef Haydn Fondunun direktoru Valter Rayxer ilə görüşüb.
Dahi Avstriya bəstəkarı Yozef Haydnın ev-muzeyində baş tutan görüşdən əvvəl muzeydə ekskursiya təşkil olunub, Yozef Haydnın yaradıcılığı və ömrünün ən məhsuldar dövrünü keçirdiyi bu evin tarixi barədə məlumat verilib. Bildirilib ki, bu evdə Y.Haydn bir çox məşhur əsərlərini bəstələyib və burada bəstəkarın şəxsi əşyaları, not əlyazmaları və onun həyatına dair tarixi materiallar nümayiş olunur.
Y.Haydnın ən məşhur əsərlərini bəstələdiyi və muzeyin əsas eksponatları sırasında yer alan şəxsi fortepianosu istisna hal olaraq Azərbaycan nümayəndə heyəti üçün açılıb və M.Hüseynov həmin fortepianoda ifa edib.
Məlumat verilib ki, klassik dövrün məşhur bəstəkarlarından olan Yozef Haydn simfoniya və simli kvartetin inkişafında böyük rol oynadığı üçün “Simfoniyanın atası” adlandırılır. Onun yaradıcılığı nizamlı forma, nikbin ruh və aydınlıqla seçilir.
Görüşdə Murad Hüseynov ölkələrimiz arasındakı mədəni əlaqələrin yüksək səviyyədə inkişaf etdiyini vurğulayıb. Nazir müavini Üzeyir Hacıbəyli və Yozef Haydn kimi dahi bəstəkarların təkcə öz xalqlarının deyil, eyni zamanda, bütün bəşəriyyətin mədəni irsinə töhfə verdiklərini və mədəniyyətin inkişafında böyük rol oynadıqlarını qeyd edib.
Tərəflər görüşdə, həmçinin klassik musiqi sahəsi, eləcə də mədəniyyət menecmenti və mədəniyyət sahəsində kadrların yetişdirilməsi ilə bağlı fikir mübadiləsi aparıblar.
Avstriyadakı Azərbaycan Mədəniyyət Mərkəzinin direktoru Leyla Qasımova iki ölkə arasında mədəni əlaqələrin möhkəmlənməsində mərkəzin fəaliyyəti barədə məlumat verib, Avstriyanın ən tanınmış fondlarından olan Haydn Fondu ilə əməkdaşlıq perspektivlərindən bəhs edib.
Tərəflər gələcəkdə həm Üzeyir Hacıbəyli Beynəlxalq Musiqi Festivalı, həm də Yozef Haydn Beynəlxalq Festivalı çərçivəsində musiqiçilərin qarşılıqlı iştirakı, simpoziumlara qatılmaq, həmçinin mədəniyyət sahəsində çalışan rəhbər və peşəkar şəxslər üçün təlim və məruzələrin təşkili barədə danışıblar.
V.Rayxer ilk dəfə Azərbaycandan nümayəndə heyətinin Haydnın ev-muzeyi və fondla tanışlığını təqdir edib, bir çox istiqamətlər üzrə əməkdaşlıq imkanlarının mövcudluğunu vurğulayıb.
Dünyanın aparıcı fortepiano istehsalçıları arasında yer alan Avstriyanın Bösendorfer manufakturasının Azərbaycan üzrə regional direktoru Olqa Huberin də qatıldığı görüş dahi bəstəkar Y.Haydnın məzarının ziyarəti ilə başa çatıb.