Respublika Gənclər Kitabxanasında Elm və Təhsil Nazirliyinin tabeliyində olan 4 nömrəli Uşaq-Gənclər İnkişaf Mərkəzi ilə birlikdə 21 Fevral - Beynəlxalq Ana Dili Günü münasibətilə tədbir keçirilib. Doğma ana dilinin mənşəyinin, tarixinin, qorunub inkişaf etdirilməsi əhəmiyyətinin təbliği məqsədilə təşkil edilən tədbirdə mərkəzin pedaqoji heyəti, dərnək üzvləri, məktəblilər, tələbə və gənclər iştirak ediblər.
Kitabxanadan “Tehsil365"ə bildirilib ki, əvvəlcə Ulu Öndər Heydər Əliyevin və dövlətin müstəqilliyi, ərazi bütövlüyü uğrunda canını fəda etmiş qəhrəman Azərbaycan oğullarının xatirəsi bir dəqiqəlik sükutla yad edilib.
Tədbiri giriş sözü ilə açan kitabxananın elmi işlər üzrə direktor müavini Günay Həsənova 21 Fevral - Beynəlxalq Ana Dili Gününün dünyada dil müxtəlifliyinin qorunması, ana dillərinə hörmətin artırılması və milli-mədəni dəyərlərin yaşadılması məqsədilə təsis olunduğunu bildirərək, ölkəmizdə bu istiqamətdə aparılan dövlət siyasəti haqqında məlumat verib. Ümummilli Lider Heydər Əliyevin Azərbaycan dilinin dövlət dili kimi möhkəmlənməsinə, milli ideologiyanın mühüm istiqaməti olan dilimizin qorunmasına göstərdiyi xüsusi diqqət və qayğıdan, indi isə bu siyasətin Prezident İlham Əliyev tərəfindən uğurla davam etdirilməsindən danışıb.
4 nömrəli Uşaq-Gənclər İnkişaf Mərkəzinin metodisti Məshəti Məmmədova ana dilinin hər bir xalqın, millətin tarixi yaddaşını, milli kimliyini, mənəvi dəyərlərini və mədəni irsini qoruyub, yaşadan ən mühüm vasitə olduğunu, insanın dünyanı dərk etməsində, milli mənsubiyyət hissinin yaranmasında əvəzsiz rol oynadığını bildirib.
Bakı Şəhər Gənclər və İdman İdarəsinin Yasamal rayonu üzrə Gənclər və idman sektorunun aparıcı məsləhətçisi Rəna Ağayeva dilimizi yad ünsürlərdən qorumağın, dilin tədrisi məsələsinə ciddi yanaşmağın zəruriliyini qeyd edib, Beynəlxalq Ana Dili Günü münasibətilə tədbir iştirakçılarını təbrik edib.
Tədbir boyunca məktəblilərin ifasında ana dilinə həsr olunan ədəbi-bədii kompozisiyalar, musiqi-rəqs nömrələri nümayiş etdirilib, dil haqqında şeirlər, hikmətli kəlamlar və mahnılar səsləndirilib.
Tədbirin sonunda “21 Fevral - Beynəlxalq Ana Dili Günü” adlı təqdimata, kitab sərgisinə və istedadlı məktəblilərin rəsmlərinə baxış keçirilib.
