İnsan psixologiyasını ən çox zədələyən duyğular arasında qorxu xüsusi yer tutur.
Psixoloq Nabat Mirzəyeva “Təhsil365”ə verdiyi açıqlamada bildirib ki, tərk edilmək qorxusu, gələcək qorxusu və daim “nələr olacaq, necə olacaq” düşüncəsi insanın daxili dünyasında ciddi narahatlıqlar yaradır.
Onun sözlərinə görə, sevilməmək, dəyər görməmək kimi düşüncələr də emosional sağlamlığa mənfi təsir göstərir. Mirzəyeva vurğulayıb ki, uzunmüddətli qorxu özünə inamsızlıq və güvənsizlik hissini gücləndirir: “İnsan bir şeyi bacaracağına, uğur qazanacağına inanmadıqca qorxular daha da çoxalır. Bu isə stres, gərginlik, yorğunluq, yuxu pozuntuları, qərarvermə qabiliyyətinin zəifləməsi ilə nəticələnir.
Münasibətlərdə aqressiya və asılılıq yaranır, ardınca isə depressiya halları müşahidə olunur.” Psixoloq qeyd edib ki, qorxunun ən təhlükəli tərəfi insanı öz potensialından imtina etməyə məcbur etməsidir: “Qorxu insanın bacarıqlarını dondurur, onu öz gücünə inanmayan bir vəziyyətə salır
. Psixoloji sağlamlığımızı qorumaq üçün duyğularımızı tanımalı, qorxularımızın mənbəyini anlamağa çalışmalıyıq. Nədən qorxuruq, bu qorxu baş verərsə nə olar – bütün bunları dərk etmək vacibdir. Qorxunu tanımaq və sağlam yollarla üzləşmək psixoloji balansın qorunmasının əsas şərtidir.