Ulu Öndər Heydər Əliyevin Azərbaycana uzunmüddətli rəhbərliyinin ən sanballı göstəricisi azərbaycançılıq məfkurəsinin və milli ruhun hədsiz yüksəlişi, milli özünüdərkin keçmişin buxovlarından azad olunması, xalqın qan yaddaşının özünə qaytarılması kimi fundamental prinsiplər əsasında milli dövlətçilik arzularının və hisslərinin güclənməsinə, real siyasi amilə çevrilməsinə nail olunmasıdır.
“Tehsil365“ AZƏRTAC-a istinadən xəbər verir ki, bu fikirlər Balakəndə Heydər Əliyev Mərkəzi və Gənclər Evinin birgə təşkilatçılığı ilə Beynəlxalq Ana Dili Günü münasibətilə “Ana dili – Heydər Əliyevin qoruduğu milli dəyər” adlı dəyirmi masada səsləndirilib.
Qeyd olunub ki, Heydər Əliyev xalqın formalaşmasında, yaşamasında ana dilinin rolunu yüksək qiymətləndirib. Belə ki, Ulu Öndər ana dilini milli kimliyin əsas amili hesab edirdi və onun dövlət dili kimi möhkəmləndirilməsi və saf saxlanılması üçün mühüm qərarlar qəbul edib.
Eyni zamanda, “Heydər Əliyev və dil mədəniyyətimiz” adlı mövzu ətrafında fikir mübadiləsi aparılıb, iştirakçılara dilimizin zənginliyi, düzgün nitq mədəniyyətinin əhəmiyyəti və gənc nəslin ana dilinə hörmət ruhunda tərbiyə olunmasının vacibliyi barədə məlumat verilib.
Daha sonra ana dilinə həsr olunmuş klassik və müasir Azərbaycan ədəbiyyatından seçmələr təqdim olunub.
