Şamaxı Heydər Əliyev Mərkəzi tərəfindən rayonda “Şəhərsalma və Memarlıq İli” çərçivəsində “Heydər Əliyev və memarlıqda milli üslub” mövzusunda konfrans keçirilib.
“Tehsil365“ AZƏRTAC-a istinadən xəbər verir ki, əvvəlcə Ümummilli Lider Heydər Əliyevin və Vətən uğrunda canından keçmiş şəhidlərimizin əziz xatirəsi bir dəqiqəlik sükutla yad edilib. Daha sonra mövzu ilə bağlı videoçarx nümayiş etdirilib.
Şamaxı Rayon Heydər Əliyev Mərkəzinin direktoru Könül Eyvazova çıxış edərək Prezidentin Sərəncamı ilə 2026-cı ilin ölkəmizdə “Şəhərsalma və Memarlıq İli” elan olunmasının əhəmiyyətindən danışıb. Bildirib ki, ilk arzusu memarlıq sənətinin incəliklərinə yiyələnmək olan Ulu Öndər Heydər Əliyevin rəhbərliyi dövründə Azərbaycanda memarlıq və şəhərsalma sahəsində mühüm işlər görülüb, şəhərlərin siması dəyişib, ictimai və yaşayış binaları, parklar, memarlıq ansamblları meydana gəlib.
Sonra AMEA Arxeologiya, Etnoqrafiya və Antropologiya İnstitutunun şöbə müdiri, Şamaxı–Ağsu Arxeoloji Ekspedisiyasının rəisi, tarix üzrə fəlsəfə doktoru Akif Quliyev çıxış edərək Şamaxı rayonunda mövcud olan tarixi və arxeoloji abidələrin yaranma tarixindən, qədim məskənlərdən, tarixi binalardan, arxeoloji qazıntılar zamanı tapılan memarlıq strukturlarından geniş məlumat verib, onların tədqiqi və təbliğinin vacibliyini vurğulayıb.
Daha sonra Dağlıq Şirvan Regional Gənclər və İdman İdarəsinin Şamaxı sektorunun müdiri Şahmar Hüseynov çıxış edərək bildirib ki, milli memarlığa Heydər Əliyevin fenomenal qayğı ənənəsini bu gün Prezident İlham Əliyev layiqincə davam etdirir. İllər uzunu erməni işğalı altında olan torpaqlarımıza Böyük Qayıdış konsepsiyasının tətbiqi, dağıdılan şəhər və kəndlərimizin yenidən qurulması, tarixi-memarlıq irsimizin bərpası ölkəmizdə memarlıq və inşaat fəaliyyətinin daha da genişlənməsinə rəvac verib. Qarabağın və Şərqi Zəngəzurun yenidən qurulması çağdaş tələblər səviyyəsində, yeni texnologiyaların, şəhərsalma standartlarının və memarlıq formalarının tətbiqi ilə gerçəkləşir.