Azərbaycanın görkəmli musiqiçisi, qoboyçu, bəstəkar və pedaqoq Kamil Cəlilov milli musiqi mədəniyyətində dərin iz qoyub.
“Tehsil365” xəbər verir ki, 29 yanvar 1938-ci ildə Bakıda anadan olan sənətkar uzun illər həm ifaçı, həm də müəllim kimi fəaliyyət göstərib.
Kamil Cəlilov qoboy və balaban ifaçılığı sahəsində yüksək ustalığı ilə tanınıb. Onun milli musiqi motivlərini klassik ifaçılıq texnikası ilə birləşdirən yaradıcılığı musiqisevərlər tərəfindən böyük maraqla qarşılanıb. Sənətkarın pedaqoji fəaliyyəti də xüsusi qeyd olunur — o, illər boyu gənc musiqiçilərin yetişməsinə töhfə verib.
1977-ci ildə onun balabanla ifa etdiyi “Muğam” (bəzən “Çahargah ahəngi” kimi də təqdim olunur) adlı kompozisiya Voyager Golden Record (Voyacer qızıl plastinkası) siyahısına daxil edilib. Bu fakt Azərbaycan musiqisinin dünya miqyasında tanıdılması baxımından mühüm hadisə kimi qiymətləndirilir.
22 fevral 2022-ci ildə Bakıda vəfat edən Kamil Cəlilovun zəngin yaradıcılıq irsi və ifaçılıq məktəbi bu gün də Azərbaycan musiqi ictimaiyyəti tərəfindən böyük ehtiramla yad olunur.