“Azərbaycan dili fənninin məzmun xətlərinə baxsaq, dinləyib-anlama bacarıqlarının formalaşdırılmasının xüsusi çəki daşıdığını görərik.”
Bu sözləri “Tehsil365”ə açıqlamasında Azərbaycan dili müəllimi Gülnarə Aslanova bildirib.
Müəllim qeyd edib ki, yeni nəsil bacarıqları arasında dinləmə və anlama ön mövqedə dayanır və bəzən dil qaydalarını əzbər bilən şagirdlərdə belə bu sahədə zəiflik müşahidə olunur.
“Bəzən dil qaydalarını testlərdə tətbiq edə bilən şagirddə anlama bacarığının zəif olduğunu görürük. Şagirdlərin mətni sürətli, amma məzmunu anlamadan oxuması, əsas ideyanı müəyyənləşdirməkdə çətinlik çəkməsi və bədii dil vasitələrini dərk etməməsi əsas problemlər sırasındadır”, — deyə o vurğulayıb.
Onun sözlərinə görə, dərsliklərdə mövzuların yetərsizliyi də bu boşluğun aradan qaldırılmasına mane ola bilir və planlı oxu vərdişinin formalaşdırılması vacibdir.
“Şagird mətni oxuyarkən ‘nə oxudum?’ sualını cavablayaraq düşünərək oxumasa, sonda tapşırıqlarda səhvə yol verməsi qaçılmaz olur. Düşünərək oxu ən mükəmməl oxu formasıdır və səbəb-nəticə əlaqələrini müəyyənləşdirən şagird daha uğurlu nəticə əldə edir”, — deyə müəllim bildirib.
Gülnarə Aslanova əlavə edib ki, söz ehtiyatının zəifliyi də Azərbaycan dili tədrisində qarşılaşılan digər çətinliklərdəndir və bunun əsas səbəbi mütaliə vərdişlərinin zəif olmasıdır.
“Frazeologizmlərin mənalarının anlaşılmaması, sözün kontekstdə yaratdığı mənanın dərk olunmaması mütaliənin azlığından qaynaqlanır. Təcrübəmə əsasən, mütaliəyə meyilli və ailədə, xüsusilə nənə-baba ilə daha çox ünsiyyət quran şagirdlərin söz ehtiyatı və ifadə imkanları daha yüksək olur”, — deyə o qeyd edib.
Müəllim sonda dilin yalnız imtahan üçün deyil, milli dəyər kimi öyrənilməsinin vacibliyini vurğulayıb və fikrini belə yekunlaşdırıb:
“Dilimizi yalnız sınaqlar üçün deyil, vətənə xidmətin ali forması kimi öyrənməliyik. Dilimizi mükəmməl bilək ki, varlığımız da möhtəşəm olsun.”