Bağırov bildirib ki, insanların təxminən 90 faizi gündəlik qidalanma ilə lazım olan vitaminləri qəbul edir.
Həkim Rasif Bağırov “Tehsil365”ə verdiyi açıqlamasında insanların gündəlik qəbul etdikləri qidaların tərkibində demək olar ki, bütün vitaminlərin mövcud olduğunu vurğulayıb. Onun sözlərinə görə, əsas məsələ hansı vitaminin çatışmazlığının olduğunu dəqiqləşdirməkdir. Çatışmazlıq müəyyən edildikdən sonra həmin vitaminin daha çox olduğu meyvə, tərəvəz və digər qida məhsullarından istifadə etməklə balansı bərpa etmək mümkündür.
Lakin bəzi hallarda orqanizmdə müəyyən vitaminlərin miqdarı az ola bilər. Bu zaman həmin vitaminin mənbəyi olan qidaların seçilməsi vacibdir. Məsələn, C vitamini daha çox sitrus meyvələrində, A vitamini kök və ispanaqda, B qrupu vitaminləri isə taxıl məhsullarında və paxlalılarda bol miqdarda mövcuddur.
Həkim xüsusi olaraq D vitamini mövzusuna toxunaraq bildirib ki, bu vitamin qidaların tərkibində olmur. D vitamini yalnız günəş işığı vasitəsilə orqanizmə daxil olur. Onun sözlərinə görə, dərman preparatlarından istifadə etmək istəməyən insanlar üçün ən yaxşı yol günəş şüalarından bol şəkildə faydalanmaqdır. Günəş vannaları qəbul etmək, açıq havada vaxt keçirmək bu vitaminin çatışmazlığının qarşısını almağın ən təbii üsuludur.
Bağırov əlavə edib ki, düzgün qidalanma və təbii mənbələrdən istifadə etməklə vitamin çatışmazlığının qarşısını almaq mümkündür. Bu yanaşma həm sağlamlığın qorunmasına, həm də dərmanlardan asılılığın azalmasına kömək edir. Onun sözlərinə görə, vitamin balansının qorunması immunitetin güclənməsinə, enerji səviyyəsinin artmasına və ümumi sağlamlığın yaxşılaşmasına səbəb olur.
Rasif Bağırov insanların sağlamlığını qorumaq üçün ilk növbədə vitamin çatışmazlığını dəqiqləşdirməyi, daha sonra isə həmin vitaminin təbii mənbələrini gündəlik qidalanmaya daxil etməyi tövsiyə edib.