Şəhər və region məktəbləri arasında təhsil keyfiyyəti ilə bağlı müqayisələr tez-tez müzakirə olunur.
Mövzu ilə bağlı Salyan rayon 7 nömrəli məktəbin müəllimi “Tehsil365” ilə həmsöhbət oldu.
– Şəhər təhsili ilə region təhsili arasında əsas oxşar cəhətlər nələrdir?
– “Əslində, tədris proqramı və kurikulum baxımından ciddi fərq yoxdur. Həm şəhər, həm də region məktəblərində eyni dövlət standartları tətbiq olunur. Dərsliklər eynidir, imtahan sistemi vahiddir. Məqsəd də birdir – şagirdlərə keyfiyyətli təhsil vermək”.
– Bəs fərqli cəhətlər daha çox hansı sahələrdə hiss olunur?
– “Fərqlər əsasən maddi-texniki baza və imkanlarla bağlıdır. Şəhər məktəblərində texnologiyaya çıxış, əlavə kurs və hazırlıq imkanları daha genişdir. Regionlarda isə bəzi məktəblərdə laboratoriya, resurs və ya ixtisaslaşmış müəllim çatışmazlığı hiss oluna bilər”.
– Müəllim potensialı baxımından vəziyyəti necə qiymətləndirirsiniz?
– “Regionlarda çox savadlı və təcrübəli müəllimlər var. Sadəcə olaraq, gənc kadrların bölgələrə cəlb olunması məsələsi hər zaman aktualdır. Bəzi ixtisaslar üzrə müəllim tapmaq çətin ola bilir. Amma ümumi olaraq region müəllimlərinin peşəkarlığını zəif hesab etmək düzgün olmaz.”
– Şagird motivasiyası baxımından fərq varmı?
– “Mən deyərdim ki, region şagirdləri daha çox çalışqan və məqsədyönlü olurlar. Onlar bəzən məhdud imkanlara baxmayaraq, böyük uğurlar əldə edirlər. Sadəcə olaraq, şəhərdə əlavə hazırlıq və repetitor imkanları daha geniş olduğu üçün nəticələrdə fərq yarana bilir.”
– Sizcə, bu fərqləri minimuma endirmək üçün nə etmək lazımdır?
– “Region məktəblərinin maddi-texniki bazasının daha da gücləndirilməsi, rəqəmsal resursların artırılması və müəllimlərin davamlı inkişaf proqramlarına cəlb olunması vacibdir. Ən əsası isə təhsil imkanlarının bütün ölkə üzrə balanslı şəkildə təmin edilməsidir”.