AMEA Folklor İnstitutunun Rəqəmsal folklor və süni intellekt şöbəsinin 2026-cı il üzrə elmi və elmi-texniki fəaliyyətinə həsr olunmuş iclas keçirilib.
Bu barədə “Tehsil365"ə institutdan məlumat verilib. Folklor İnstitutunun direktoru, Rəqəmsal folklor və süni intellekt şöbəsinin müdiri vəzifəsini icra edən filologiya elmləri doktoru Hikmət Quliyev rəqəmsal transformasiya proseslərinin, süni intellektin tətbiqinin elmi müəssisələr qarşısında yeni vəzifələr yaratdığını diqqətə çatdırıb. O, folklorşünaslıq sahəsində bu yanaşmaların tətbiqinin zəruriliyini xüsusi qeyd edib.
İclasın gündəliyinə Prezident İlham Əliyevin sədrliyi ilə keçirilmiş “Azərbaycanın yeni rəqəmsal arxitekturası” adlı vahid fəaliyyət planına həsr olunmuş müşavirədə səsləndirilən məsələlər daxil edilib. Bildirilib ki, ölkə miqyasında rəqəmsal idarəetmə modelinin formalaşdırılması, informasiya resurslarının inteqrasiyası və süni intellekt texnologiyalarının tətbiqi elmi müəssisələrin fəaliyyətində prioritet istiqamətlər kimi nəzərə alınmalıdır.
Daha sonra şöbənin əməkdaşlarının elmi və elmi-texniki fəaliyyətini əks etdirən 2026-cı il üzrə fəaliyyət planı müzakirə olunub. Qeyd edilib ki, şöbənin prioritet istiqamətləri arasında sosial-antropoloji folklorşünaslıq yanaşmaları əsasında rəqəmsal transformasiyaların yaratdığı yeni virtual sosial-mədəni dinamikanın öyrənilməsi və İnternet folklorunun müxtəlif aspektlərinin araşdırılması yer alır. Eyni zamanda, Milli Rəqəmsal Folklor Verilənlər Bazasının arxitekturasının formalaşdırılması, tədqiqat proseslərində süni intellektin tətbiqi və elmi-nəzəri məsələlərin təhlili də fəaliyyət planının əsas istiqamətləri kimi müəyyən edilib.
İclasda vurğulanıb ki, şöbənin fəaliyyəti yalnız rəqəmsallaşma və süni intellektin tətbiqi ilə məhdudlaşmır, eyni zamanda, institut miqyasında elektron elmi informasiya bazalarına inteqrasiyanın gücləndirilməsini, bu sahədə seminar və təlimlərin təşkili işlərini də əhatə edir. Şöbənin fəaliyyətində elmi tədqiqatçılarla bərabər, mühəndis-proqramçılar, elektron informasiya sistemlərinin idarə olunmasında və digər texniki sahələrdə çalışan mütəxəssislərin iştirakı da mühüm əhəmiyyət kəsb edir.
AMEA Rəyasət Heyəti aparatının Elm və Təhsil şöbəsinin müdiri filologiya elmləri doktoru Sərxan Xavəri, elmi işlər üzrə direktor müavini Afaq Ramazanova, elmi katib Elçin Abbasov və digər əməkdaşlar şöbənin qarşısında duran vəzifələrin institutun müasir çağırış və tələblər səviyyəsində fəaliyyətinin təşkili baxımından mühüm əhəmiyyət daşıdığını vurğulayıblar.
