İsrailin Hayfa Universiteti magistratura proqramları üzrə tələbə müraciətlərini (bakalavr və magistr) qəbul edir.
Bakı Dövlət Universitetindən (BDU) “Tehsil365"ə bildirilib ki, “Dəniz sivilizasiyaları (Maritime Civilizations)” üzrə magistr proqramı (1 yer) arxeologiya sahəsi üzrə ixtisaslaşmış, dəniz və sahil mühitində formalaşmış cəmiyyətlərin maddi mədəniyyətinin, iqtisadiyyatının və sosial strukturlarının elmi-arxeoloji metodlarla tədqiqinə yönəlib. Məzunlara humanitar elmlər sahəsi üzrə magistr dərəcəsi veriləcək. Təhsil müddəti 1+1 il olan proqramın əsas istiqaməti dəniz arxeologiyası, sahil arxeologiyası və sualtı arxeoloji tədqiqatlar üzərində qurulub. Tədris prosesi dənizlə bağlı arxeoloji abidələrin – liman qurğularının, batmış yaşayış yerlərinin, gəmi qalıqlarının, sahil infrastrukturlarının və dəniz ticarəti ilə əlaqəli maddi-mədəniyyət nümunələrinin öyrənilməsini əhatə edir.
Bu proqramın mühüm üstünlüklərindən biri Hayfa Universitetinin dəniz arxeologiyası sahəsində beynəlxalq nüfuza malik elmi mərkəzlər ilə əlaqəsidir. Burada tələbələr sualtı arxeologiya, sahil tədqiqatları və dəniz mədəni irsinin qorunması üzrə praktiki təlimlər keçəcək və Aralıq dənizi regionunda aparılan real arxeoloji layihələrdə iştirak imkanı qazanacaqlar.
Proqrama arxeologiya, tarix, antropologiya, klassik tədqiqatlar, Yaxın Şərq araşdırmaları (arxeologiya üzrə baza biliklərinə malik olanlar) üzrə bakalavr və ya magistr dərəcəsi olan namizədlər qəbul edilə bilər.
“Arxeometriya (Archaeological Science)” üzrə magistr proqramı (1 yer) arxeoloji tədqiqatlarda dəqiq və təbiət elmlərinin metodlarının tətbiqinə əsaslanır və yüksək elmi-analitik yöndədir. Məzunlara dəqiq elmlər sahəsi üzrə magistr dərəcəsi veriləcək. Təhsil müddəti 2+1 il olan proqramın əsas tədris istiqaməti kimya və fizika elmlərinə söykənir. Tədris prosesi arxeoloji materialların (keramika, metal, şüşə, daş və s.) tərkib analizi, istehsal texnologiyalarının öyrənilməsi, yaş təyini üsulları, izotop analizləri və laboratoriya əsaslı elmi interpretasiya bacarıqlarının formalaşdırılmasını nəzərdə tutur.
Proqramın mühüm üstünlüklərindən biri Texnion – İsrail Texnologiya İnstitutu ilə əməkdaşlıqdır. Tələbələr yüksək texnoloji laboratoriyalarda praktiki kurslara qoşulacaq, Texnion bazasının yüksək dəqiqlikli SEM mikroskopları, konfokal mikroskoplar, eləcə də digər müasir fiziki-kimyəvi analiz metodlarından istifadə imkanı əldə edəcəklər.
Bu proqrama kimya, fizika, materialşünaslıq, geologiya, arxeologiya (dəqiq elmlər üzrə baza biliklərinə malik olanlar) üzrə bakalavr və ya magistr dərəcəsi olan namizədlər qəbul edilə bilər. Onlardan analitik düşünmə bacarığı, laboratoriya tədqiqatlarına maraq və elmi potensial tələb olunur.
Tədris ödənişsizdir. Tələbələr yataqxana və təqaüdlə təmin olunacaq.
Əlaqə üçün [email protected] [email protected] ünvanlarına yazmaq olar.