“Son illərdə region məktəblərində qəbul imtahanlarında yüksək nəticə göstərən abituriyentlərin sayının artması təhsildə müsbət dinamikanın göstəricisidir.”
Bu sözləri “Tehsil365”ə açıqlamasında təhsil eksperti Ramin Nurəliyev bildirib.
Ekspert qeyd edib ki, əvvəlki illərlə müqayisədə regionlarda erkən nikah və təhsildən yayınma hallarının azalması aparılan tədbirlərin nəticə verdiyini göstərir.
“Əgər əvvəllər bölgələrdə gənclərin təhsildən uzaqlaşdırılması və erkən nikaha cəlb olunması halları daha çox idisə, bu gün artıq operativ tədbirlər öz bəhrəsini verməkdədir”, — deyə o vurğulayıb.
Onun sözlərinə görə, qəbul imtahanlarında yüksək bal toplayan qız abituriyentlərin artması regionlarda ailələrin düşüncəsinin dəyişdiyini göstərir.
“Bu gün yüksək nəticə göstərən qızlarımızın sayının artması onu deməyə əsas verir ki, artıq bölgələrdə qız uşaqlarının təhsili prioritet məsələyə çevrilib”, — deyə ekspert bildirib.
Bununla belə, Ramin Nurəliyev region məktəblərində hələ də müəyyən problemlərin qaldığını qeyd edib. Onun fikrincə, xüsusilə ucqar və dağlıq ərazilərdə müəllim çatışmazlığı və maddi-texniki bazanın zəifliyi əsas çətinliklərdəndir.
“Müəllimlərin regionlara cəlb olunması üçün əlavə imtiyazlar tətbiq edilməlidir. Yol xərclərinin ödənilməsi, əməkhaqqına əlavələrin verilməsi kimi təşviq mexanizmləri bölgələrdə təhsilin keyfiyyətinə müsbət təsir göstərə bilər”, — deyə o qeyd edib.
Ekspert əlavə edib ki, hazırda müəllimlərin və abituriyentlərin daha çox şəhərlərə üz tutması da narahatlıq doğuran məqamlardandır. Onun sözlərinə görə, maddi-texniki bazanın gücləndirilməsi və internet resurslarına əlçatanlığın artırılması region məktəblərinin inkişafını sürətləndirə bilər.
Ramin Nurəliyev hesab edir ki, sistemli və davamlı islahatlar həyata keçirilərsə, region məktəbləri də şəhər məktəbləri ilə rəqabət apara biləcək səviyyəyə yüksələ bilər.