Marneuli rayonunun “Sadaxlı Təhsil və İnteqrasiya Mərkəzi”ndə Xocalı soyqırımının 34-cü ildönümü ilə əlaqədar tədbir keçirilib.
“Tehsil365" xəbər verir ki, əvvəlcə soyqırımı qurbanlarının xatirəsi bir dəqiqəlik sükutla yad edilib.
Mərkəzin rəhbəri Samir Şərifov Xocalı soyqırımının səbəbləri, faciənin ağır nəticələri, dinc əhaliyə qarşı törədilmiş kütləvi qırğın faktları, həmin hadisələrin beynəlxalq hüquq normaları baxımından qiymətləndirilməsi barədə ətraflı məlumat verib. O, Xocalı həqiqətlərinin dünya ictimaiyyətinə çatdırılması istiqamətində Ulu Öndər Heydər Əliyevin rolunu xüsusi qeyd edib. Ulu Öndərin yürütdüyü siyasətin Prezident İlham Əliyev tərəfindən uğurla davam etdirildiyini bildirib.
Digər çıxış edənlər 44 günlük Vətən müharibəsində Müzəffər Ali Baş Komandan Prezident İlham Əliyevin rəhbərliyi ilə şanlı Ordumuzun torpaqlarımızı işğaldan azad etdiyini, bununla da Xocalı faciəsi qurbanlarının qisasının alındığını xüsusi qeyd ediblər.
Sonda Mərkəzdə təhsil alan şagirdlər və tələbələr Xocalı soyqırımına həsr edilən şeirlər söyləyiblər.