AMEA Arxeologiya və Antropologiya İnstitutunun İçərişəhərdə yerləşən muzey-sərgi zalında “Milli, maddi-mədəni irsin qorunması və bələdçilik praktikası” mövzusunda elmi-praktik təlim-treninq təşkil olunub.
Bu barədə “Tehsil365"ə institutdan məlumat verilib. Azərbaycan Dövlət Mədəniyyət və İncəsənət Universiteti (ADMİU) ilə birgə təşkil edilən tədbirin əsas məqsədi turizm bələdçilərinin peşəkar fəaliyyətinin əhəmiyyətini vurğulamaq, mədəni irsin elmi əsaslarla şərhini təşviq etmək və müasir bələdçilik yanaşmalarını ictimai müzakirəyə çıxarmaqdır. Təlimlər gənclərin inkişafını və praktiki təcrübə qazanmasını dəstəkləyən “Könüllülük Proqramı” çərçivəsində institutun yeni yaradılmış Arxeoloji Dərnəyinin fəal iştirakı ilə keçirilib.
Tədbirin mahiyyəti və aktuallığı barədə məlumat verən institutun Elmi ekspozisiyanın təşkili şöbəsinin müdiri Orxan Zamanov maddi-mədəni irsin qorunması, elmi əsaslarla təqdim olunması və cəmiyyətə düzgün çatdırılması məsələlərini vurğulayıb.
İnstitutun elmi katibi tarix üzrə fəlsəfə doktoru, dosent Ellada Bəkirova, ADMİU-nun Muzeyşünaslıq və turizm kafedrasının professoru Lətifə Summerer, ADMİU-nun Muzeyşünaslıq və turizm kafedrasının baş müəllimi Əli Abuzərov turizm bələdçilərinin milli kimliyin təbliği və ölkənin beynəlxalq imicinin formalaşdırılmasındakı rolunu xüsusi vurğulayıblar.
Tədbirdə “Arxeoloji qazıntıdan arxeoturizmə və muzey arxeologiyasına”, “Müasir bələdçilik fəaliyyəti və kommunikasiya bacarıqları”, “Muzeylərdə arxeoloji irsin tədrisi - elmi-metodik yanaşmalar və perspektivlər”, “Muzeylərdə maddi-mədəniyyət nümunələrinin düzgün tanıdılması”, “Tarixin canlı səsi: peşəkar muzey bələdçisi”, Bələdçinin uğur modulu nədir?” mövzularında məruzələr dinlənilib. Çıxışlarda arxeoloji tədqiqatların əhəmiyyəti, arxeoloji irsin turizm potensialı və muzey mühitində təqdimat mexanizmləri barədə geniş elmi məlumat verilib. Bələdçilərin peşəkar etikası, auditoriya ilə effektiv ünsiyyətqurma bacarıqları və beynəlxalq standartlara uyğun fəaliyyət prinsipləri barədə fikirlər bölüşülüb. Qeyd olunub ki, bələdçi yalnız məlumat ötürən şəxs deyil, həm də tarixi yaddaşın daşıyıcısı və auditoriya ilə mədəni dialoq qurmağı bacaran peşəkar kommunikator olmalıdır. Müasir bələdçinin peşəkar inkişaf modeli, kommunikasiya bacarıqları, etik davranış prinsipləri və auditoriya ilə interaktiv əlaqə qurma üsullarından söz açılıb. Məruzələrdə muzeylərin təhsil prosesində rolu, arxeoloji eksponatların elmi-tədris potensialı və “muzey - tədris laboratoriyası” modeli barədə ətraflı məlumat verib. Bildirilib ki, eksponatların elmi interpretasiyası, təqdimat dili və terminoloji dəqiqlik məsələlərinə toxunub.
İştirakçılar arasında turizm bələdçiliyinin elmi-metodik əsasları ətrafında fikir mübadiləsi aparılıb.
Təlim-treninqlər fevralın 24-dək davam edəcək.