Məktəbəqədər dövr uşağın şəxsiyyətinin formalaşdığı ən həssas mərhələlərdən biri hesab olunur. Mütəxəssislər bildirirlər ki, bu yaşda qazanılan təcrübə yalnız akademik deyil, eyni zamanda psixoloji inkişaf baxımından da həlledici rol oynayır. Bəs məktəbəqədər təhsil uşağın psixoloji formalaşmasına necə təsir edir?
Mövzu ilə bağlı psixoloq “Tehsil365"ə açıqlama verib.
Psixoloq bildirib ki, “Məktəbəqədər təhsil uşağın emosional sabitliyinin, sosial bacarıqlarının və özünəinamının formalaşmasında mühüm rol oynayır. Uşaq kollektiv mühitdə ünsiyyət qurmağı, paylaşmağı və qaydalara əməl etməyi öyrənir.”
Onun sözlərinə görə, bu mərhələdə uşağın sosial adaptasiya bacarığı inkişaf edir: “Bağça mühiti uşağı məktəb həyatına psixoloji cəhətdən hazırlayır. Uşaq müəllimlə münasibət qurmağı, həmyaşıdları ilə əməkdaşlıq etməyi və emosiyalarını idarə etməyi öyrənir.”
Psixoloq qeyd edib ki, oyun əsaslı fəaliyyətlər psixoloji inkişaf üçün xüsusi əhəmiyyət daşıyır: “Oyun uşağın daxili dünyasının ifadə vasitəsidir. Bu proses zamanı uşağın yaradıcılığı, problem həll etmə bacarığı və emosional intellekti formalaşır.”
Mütəxəssis vurğulayıb ki, məktəbəqədər təhsil uşağın gələcəkdə stresə davamlılığına da təsir göstərir: “Erkən yaşda sağlam sosial mühitdə böyüyən uşaqlar dəyişikliklərə daha rahat uyğunlaşır və akademik çətinliklərlə daha asan mübarizə aparırlar.”
Sonda psixoloq əlavə edib ki, “Keyfiyyətli məktəbəqədər təhsil və valideyn dəstəyi birlikdə uşağın sağlam psixoloji inkişafının əsasını təşkil edir.”