Əzizli bildirib ki, bu fərq pasiyentlərin seçimində mühüm rol oynayır: “Pasiyent bilməlidir ki, hansı dolğunu seçir və onun fəsadları hansı üsulla aradan qaldırıla bilər.”
Həkim-kosmetoloq Tünzalə Əzizli “Tehsil365”ə verdiyi açıqlamada bildirib ki, botoks, dolğu və digər dəri altı enjeksion prosedurlar hər zaman müəyyən risklərlə müşayiət olunur. Onun sözlərinə görə, bu müdaxilələr kosmetik məqsəd daşısa da, düzgün aparılmadıqda və ya keyfiyyətsiz preparatlardan istifadə olunduqda ciddi fəsadlara səbəb ola bilər.
Əzizli vurğulayıb ki, ən çox rast gəlinən yan təsirlər arasında dəridə göyərmə, şişkinlik və hematoma var. Bunlar müvəqqəti olsa da, pasiyentlərdə narahatlıq yaradır. Lakin daha ağır hallarda botoks proseduru zamanı putoz adlanan vəziyyət – yəni göz qapağının sallanması – müşahidə oluna bilər. Bu, preparatın düzgün vurulmaması, keyfiyyətsiz məhsuldan istifadə edilməsi və ya pasiyentin prosedur sonrası qaydalara əməl etməməsi nəticəsində ortaya çıxır.
Ekspert əlavə edib ki, botoksun nadir hallarda daha ciddi fəsadları da ola bilər: nəfəsalma çətinliyi, baş ağrıları və digər sistemik təsirlər. Bu səbəbdən pasiyentlərin prosedurdan əvvəl mütləq şəkildə həkimlə məsləhətləşməsi və yalnız peşəkar mütəxəssislərə müraciət etməsi vacibdir.
Dolğu prosedurlarında da oxşar risklər mövcuddur. Əzizli qeyd edib ki, enjeksion yerlərində göyərmə və hematoma tez-tez rast gəlinir. Əgər düzgün preparat seçilməzsə, dolğunun miqrasiyası – yəni lazım olmayan nahiyələrə yayılması – və ya toparlanma – dəri altında sərtlik və düyünlərin əmələ gəlməsi – baş verə bilər.
Bu halların müalicəsi dolğunun növündən asılıdır. Süni dolğular yalnız cərrahi müdaxilə ilə çıxarıla bilər. Təbii dolğular isə xüsusi ferment vasitəsilə əritmək mümkündür.
Ekspertin sözlərinə görə, bütün bu risklərə baxmayaraq, enjeksion prosedurlar peşəkar həkimlər tərəfindən, keyfiyyətli preparatlarla və düzgün şəraitdə aparıldıqda təhlükəsiz hesab olunur. Əsas məsələ pasiyentin həkim göstərişlərinə əməl etməsi və prosedurdan sonra lazımi qaydalara riayət etməsidir.