Son illərdə məktəblərdə tətbiq olunan davamlı qiymətləndirmə sistemi – formativ və summativ yoxlamalar – təhsil prosesinin əsas komponentinə çevrilib. Bu sistem şagirdin bilik səviyyəsini mütəmadi izləməyi hədəfləsə də, bəzi valideynlər və müəllimlər bunun uşaqlarda əlavə psixoloji təzyiq yaratdığını düşünürlər. Bəs davamlı qiymətləndirmə həqiqətən şagirdlərdə stressi artırırmı?
Mövzu ilə bağlı psixoloq “Tehsil365"ə açıqlama verib.
Psixoloq bildirib ki, “Davamlı qiymətləndirmə düzgün tətbiq olunmadıqda şagirdlərdə daimi nəzarət altında olma hissi yarada bilər. Bu isə zamanla gərginlik və performans narahatlığına səbəb ola bilər.”
Onun sözlərinə görə, problem qiymətləndirmənin özündə deyil, yanaşma tərzindədir: “Əgər qiymət yalnız nəticə kimi təqdim olunur və inkişaf yönümlü rəy verilmirsə, uşaq hər yoxlamanı təhlükə kimi qəbul edə bilər.”
Mütəxəssis qeyd edib ki, xüsusilə yüksək gözlənti olan mühitdə böyüyən uşaqlarda təzyiq hissi daha güclü olur: “Valideyn və müəllim reaksiyası şagirdin psixoloji vəziyyətinə birbaşa təsir edir. Dəstəkləyici münasibət stressi azalda, tənqidçi yanaşma isə onu artıra bilər.”
Psixoloq vurğulayıb ki, davamlı qiymətləndirmə əslində düzgün qurulduqda motivasiyaedici ola bilər: “Əgər şagird öz inkişaf dinamikasını görürsə və səhvlərini öyrənmə fürsəti kimi qəbul edirsə, bu sistem müsbət nəticə verə bilər.”
Sonda qeyd olunub ki, qiymətləndirmə mexanizmləri ilə yanaşı, məktəblərdə psixoloji dəstək və maarifləndirmə tədbirlərinin gücləndirilməsi də vacibdir.