Azərbaycanı beynəlxalq arenada uğurla təmsil etmiş tanınmış idmançı və məşqçi İradə Süleyman qızı Aşumovain doğum günü münasibətilə idman ictimaiyyəti tərəfindən təbrik mesajları səsləndirilir.
“Tehsil365” xəbər verir ki, 1958-ci il fevralın 25-də Bakı şəhərində anadan olan İradə Aşumova uzun illər güllə atıcılığı üzrə yüksək səviyyədə çıxış edib. O, 1974–1991-ci illərdə SSRİ yığma komandasının, 1991–2015-ci illərdə isə Azərbaycan milli komandasının heyətində ölkəni nüfuzlu beynəlxalq yarışlarda təmsil edib.
Zəngin idman karyerası ərzində bir sıra mötəbər turnirlərdə uğurlu nəticələr əldə edən Aşumova, dəqiqliyi və peşəkarlığı ilə seçilərək Azərbaycan atıcılıq məktəbinin inkişafına mühüm töhfə verib. Aktiv idman fəaliyyətini başa vurduqdan sonra isə məşqçi kimi çalışaraq gənc atıcıların hazırlanmasında yaxından iştirak edib.
İradə Aşumova Azərbaycan idman tarixində özünəməxsus yeri olan, təcrübəsi və nailiyyətləri ilə yeni nəslə örnək göstərilən idmançılardandır.